Во Основниот суд во Струга денеска беше одложено рочиштето за случајот со родилката од Дебар, Јилдз Веапоска, која пред три години при породување со царски рез остана без матка, јајник и бубрег. Лекарот од Клиниката за гинекологија кој требало да сведочи, бил на годишен одмор. Веапоска пред медиумите не ја криеше својата разочараност и вознемиреност од бавниот судски процес.
„Колку години ќе ја барам правдата во овие судски врати не знам, зашто доста сум физички оштетена, половина човек сум и психички ќе се пореметам. Додека сум жива, нема да се откажам од правдата. Не знам колку ќе бидам жива и психички ќе можам да го издржам сето ова малтретирање во овој суд“
изјави Веапоска.
Дополнителен проблем е што судијата заминува во пензија и треба да се распредели нов на случајот. Тоа ќе биде трет судија бидејќи и претходниот се пензионира.
Адвокатот на Веапоска, Сашо Јанев, се сомнева дека случајот е „врел костен“ од кој сите бегаат.
„Сите бегаат како ѓавол од крст од овој предмет, но нема каде да бегаат. Еден ден ќе падне пресуда и јас гарантирам дека таа пресуда ќе биде осудителна. Нема каде да бегаат од вистината и правдата, ако се огрешиле кон законот, мора да одговараат“
рече Јанев.
Судскиот процес, кој почна во јуни минатата година, се води против тројца лекари. Првообвинет е поранешниот директор на струшката болница Мухамед Асани, а обвинети се и неговиот син Блертон Асани и Лилјана Јованоска. Се теретат за тешки дела против здравјето на луѓето.
Асани веќе доби условна казна поради тоа што имал нелегална гинеколошка ординација во својот дом, каде што давал здравствени услуги. Меѓу пациентките била и Веапоска, на која при породување со царски рез, ѝ беа извадени органите.