Менаџментот на скопскиот ресторан „Рагуза 360“ преку соопштение информира дека ниту еден од нивните вработени немале контакт со докторката на која денеска и беше потврден коронавирусот.
Во нивните простории минатава сабота на 7 март се одржа симпозиумот на дерматовенеролози на која присутна била директорката на Клиниката за кожни болести, која е четвртиот потврден случај на коронавирус во земјава. Тие додаваат дека после тој настан, не организирале друг настан во истата просторија.
„Согласно денешните написи во медиумите за стручното предавање на дерматолозите одржан изминатата сабота, 7 март 2020, во нашиот ресторан ‘Рагуза 360’ би сакале да ја известиме јавноста дека нашите вработени не беа во директен контакт со заболената пациентка од корона вирус, која предаваше на настанот. По одржување на настанот до денеска немавме одржување на други настани или прослави“,
се вели во соопштението.
Во дописот додаваат дека објектот е дезинфициран од Институтот за јавно здравје.
Од менаџментот велат дека тие телефонски разговарале со своите вработени, како и тие кои што директно служеле во салата.
„Тие засега немаат симптоми, но сепак одлучивме да се дома, да не доаѓаат на работа и да направат тест за вирусот“,
велат од ресторанот.
Тие додаваат дека откако ја дознале информацијата за заболената докторка, веднаш побарале од Институт за јавно здравје темелно да извршат комплетна дезинфекција на објектот.