Раководството на Алтернатива, пак, вечерва имаше состанок токму за прашањето како да се постават нивните пратеници околу прашањето за гласање доверба на Владата, но не донесе конечен став туку најави одлука до среда
Пратеникот од Алтернатива, Скендер Реџепи-Зејд, во вечерашното гостување во емисијата „Клик плус“ на ТВ21 најави дека ќе ја напушти партијата, а најверојатно ќе поднесе и оставка од функцијата пратеник, доколку неговата партија одлучи да ја урива актуелната Влада заедно со Левица.
„Во моментот кога политичкиот субјект на кој припаѓам (Алтернатива) утре или задутре, се одлучи да го прифати потписот заедно со Левица на списокот, тогаш мојата одлука ќе биде сигурно напуштање на партијата, можам дури и да го вратам пратеничкиот мандат“,
рече Реџепи-Зејд за ТВ21.
Раководството на Алтернатива, пак, вечерва имаше состанок токму за прашањето како да се постават нивните пратеници околу прашањето за гласање доверба на Владата, но не донесе конечен став туку најави одлука до среда.
„Со оглед на тоа дека имаме време до четврток, дискусиите во партијата ќе продолжат и утре и најдоцна до среда ќе имаме конкретен став како ќе настапат нашите пратеници. Меѓутоа, едно сигурно можам да кажам – каква било одлука и да имаме тоа ќе се почитува од сите пратеници од Алтернатива“,
рече портпаролот на партијата, Орхан Муртезани по состанокот.
Алтернатива има четири пратеници. Покрај Скендер Реџепи-Зејд, пратеници од оваа партија се и лидерот Африм Гаши, како и Сафије Садики-Шаини и Хусни Исмаили. Тие беа дел од мнозинството од 61 пратеник за кое лидерот на ВМРО-ДПМНЕ, Христијан Мицкоски, во петокот објави дека е собрано за пад на актуелната Влада.