Тренчевска вели дека Владата е апсолутно подготвена да го отвори и прашањето за донесување нов општ колективен договор за јавниот сектор
Заедно со претставниците на Самостојниот синдикат за образование, наука и култура (СОНК) и со другите синдикати ќе седнеме на маса и ќе го отвориме процесот на колективно договарање и усогласувањето на платите, рече министерката за труд и социјална политика, Јована Тренчевска, во интервју на Сител.
Таа посочи дека Владата веќе се изјаснила дека е апсолутно подготвена да го отвори прашањето за донесување нов општ колективен договор за јавниот сектор, со кој ќе се уреди и правото на регрес за К-15 и усогласувањето на платите со минималната плата.
„Нема решение за овие теми за само еден ден. Тие преговори траат и ние сме подготвени да ги започнеме. Затоа треба трпение и од синдикатот, бидејќи ние како Влада покажавме посветеност во решавањето на прашањата за унапредување на правата на работниците и на правата од работниот однос“,
рече Тренчевска.
Со неодамна постигнатиот договор меѓу Владата, синдикатите и работодавачите, минималната плата се зголеми за околу 3 000 денари. Со новиот Закон, минимална плата сега изнесува 18 000 денари.