Одбраната во завршните зборови остана на тврдењето што го застапуваше во текот на целиот судски процес дека обвинетите не се вистинските сторители и оти станува збор за конструиран случај
Овој случај наликува на аферата „Драјфус“, која е синоним за невино осудени, и ја подели нашата јавност. Меѓутоа, оваа македонска верзија на „Драјфус“ имаше поголеми последици бидејќи шест невини лица беа осудени на доживотен затвор во првата постапка.
Вака адвокатот на дел од обвинетите во случајот „Монструм“, Насер Рауфи, ги започна завршните зборови во повторениот судски процес за петкратното убиство кај Смилковско Езеро од 2012.
Тој остана на теоријата што ја застапува одбраната во текот на целиот судски процес, односно дека обвинетите не се вистинските сторители и оти станува збор за конструиран случај.
Според Рауфи, во прилог на тоа оди и што веднаш по петкратното убиство месното население од Радишани, од каде што се убиените момчиња, и од Црешево, од каде што е убиениот рибар, организирало протести, а како виновници ги посочувало Албанците.
„Какви сознанија имале лицата што протестирале? Одговорот е едноставен – однапред смислено сценарио. Ваквите протести беа подгреани од непрофесионално известување од медиуми кои ја поддржаа оваа хајка. Потоа следуваше полициска акција и беа лишени од слобода не само овие обвинети туку и други 20-ина лица“,
рече Рауфи кој додаде дека лицата предвреме биле осудени уште со изјавата на тогашната министерка Гордана Јанкулоска дека се уапсени сторителите.
Тоа што се зборувало дека лицата биле дел од исламистички групи, како што рече, испратило јасна порака за што тие ќе бидат обвинети.
рече Рауфи.
„Повеќе од јасно беше и дека ќе бидат обвинети за тероризам. По проверката на обвинетите, излезе дека не се членови на исламистичка група, дека не биле во земјите од Блискиот Исток ни како туристи, а не па како терористи“,
Адвокатот понатаму се осврна на искази на дел од сведоците. Тие беа Роми и чесни луѓе, рече тој, и сведочеа дека обвинетите не се оние што ги виделе на самото место. Адвокат потоа уште еднаш посочи дека нивната теорија е оти обвинетите не се вистински сторители.
„Според одбраната, теоријата на случај се сведува на тоа што органите на прогонот не успеаја да ги откријат и да ги уапсат вистинските сторители, избрзаа“,
рече адвокатот.
Понатаму тој се осврна посебно на секој од обвинетите, за вештачењата на „опел омегата“ и за примероците земја од местото на настанот кои ги оспоруваа и во текот на целата постапка.
Неговите завршни зборови се во тек. По него треба да зборуваат уште тројца други адвокати од одбраната, а право на завршни зборови имаат и обвинетите.
Претходно, завршни зборови дадоа и адвокатите на семејствата на жртвите, а на минатото рочиште тоа го направија и обвинителите Фатиме Фетаи и Гаврил Бубевски.
Случајот во јавноста познат како „Монструм“ се однесува на петкратното убиство кај Смилковско Езеро на 12 април 2012 година. На самото место беа убиени четири момчиња од македонска националност на возраст од 18 до 21 година од населбата Радишани: Филип Славковски, Александар Наќевски, Цветанчо Ацковски и Кире Трпковски, како и 45-годишниот Борче Стевковски од селото Црешево. Обдукцијата покажа дека во нив е пукано од три типа огнено оружје.
За убиствата беа обвинети шест лица: Агим Исмаиловиќ, Фејзи Азири, Африм Исмаиловиќ, Алил Демири, Хаки Азири и Сами Љута. Африм Исмаиловиќ и Алил Демири веднаш избегаа на Косово и досега не се екстрадирани. По првото судење, петмина од групата добија доживотна казна затвор, но Врховниот суд ја укина пресудата во 2017 година. Случајот го презеде СЈО и судењето почна од почеток, но и по повторената постапка, при која беа земени предвид и т.н. „бомби“, обвинителката Фатиме Фетаи остана на позицијата дека обвинетите го сториле делото, со исклучок на Сами Љума, за кој кажа дека нема докази. Таа побара доживотен затвор за Алил Демири, Африм и Агим Исмаиловиќ за делото тероризам и максимални казни за Фејзи и Хаки Азири, кои се обвинети за помагање. Максималните казни што ги посочи таа за двајцата обвинети се 15, односно 9 години затвор.