Премерот рече дека со новиот закон платите ќе растат во зависност од неколку фактори, како порастот на трошоците на живот, од зголемувањето на просечната плата и од зголемување на перформансите на работниците
На денешната седница за пратенички прашања премиерот Димитар Ковачевски најави дека ќе има зголемување на платите со воведување методологија за пораст на платите која ќе зависи од порастот на трошоците на живот, од зголемувањето на просечната плата и од зголемување на перформансите на работниците.
Премиерот најави воведување закон за плати со кој ќе се знае која ќе биде конзистентноста и структурата на платите во државата. Тој наведе дека таков закон веќе има во Белгија и во други земји.
„Такви закони се болни зашто голем дел од државна управа не сакаат да ги прифатат бидејќи во секоја институција има вработени кои имаат и натпросечни плати, но има и вработени во институции кои имаат помали плати, потпросечни плати, а врз кои паѓа голем дел од товарот на работата, но заради хронолошки, системски и нерешени прашања тоа останало така“,
рече Ковачевски.
Премиерот иформира дека им дал задача на вицепремиерот за економски работи, на министерот за финансии и на министерката за труд и социјална политика да изготват такво законско решение, а социјалниот дијалог со Сојузот на синдикатите на Македонија (ССМ) да се води во насока на воспоставување методологија која ќе обезбеди поголеми плати.
Ковачевски информира дека оваа влада води дијалог со Сојузот на синдикатите на Македонија (ССМ) за сите прашања кои ги засегаат работниците, а претходно одлуки се носеле само во Владата без да бидат консултирани синдикатите.
Тој потсети дека беше зголемена минималната плата на највисоко ниво досега или на 18.000 денари.
Одговорот на Ковачевски следуваше по поставеното прашање од Бојан Стојаноски, пратеник од редовите на ВМРО-ДПМНЕ, кој праша дали ќе биде прифатен предлогот на ССМ за линеарно покачување на платите за 2 806 денари бидејќи, како што рече, во моментов е тешко да се сврзе крај со крај за македонскиот работник.
Стојаноски рече дека овие прашања се директно произлезени од синдикатите и се нивна желба. ССМ и КСС, како најголеми синдикални организации во државата, се обратија до сите политички партии во парламентот и до сите координатори со испратени писмени барања со барање за изнаоѓање пратеничка група која нивни барања ќе ги преточи во амандман за тие да бидат расправани и усвоени.
„Имаме секојдневни штрајкови од различни синдикални организации, можеме да посведочиме дека во моментов е навистина тешко да се сврзе крај со крај за македонскиот работник затоа што имаме историски највисока инфлација, сиромаштијата галопирачки расте, цената на горивата никогаш не била повисока, цената на храната исто така не била никогаш повисока и не престанува да расте а цената на енергенсите галопирачки исто така се вивнува во облаците и не престанува да расте таа цена“,
потенцираше Стојаноски.
Стојаноски посочи дека потрошувачката кошничка секојдневно се зголемува, платите во Република Македонија ја губат трката со зголемените цени. Додека пак трите главни контибутори за една обична нормална живеачка, горивата, храната и цената на струјата не престануваат да растат. Затоа, рече пратеникот, сосема е логично барањето на работниците за повисоки плати.