Ексгенералниот секретар на Владата бара обвинителката да каже јавно кој, на кое место и кога ѝ понудил да биде назначена за заменик-републички обвинител, а нејзиниот внук унапреден од основен во виш обвинител
Поранешниот генерален секретар од Владата Драги Рашковски бара јавно извинување од обвинителката Вилма Русковска или во спротивно најавува дека ќе поднесе тужба за вчерашните нејзини изјави дека ѝ било нудено унапредување за неа – во заменик-републички обвинител и за внукот од сестра – од ОЈО Куманово во скопското Вишо обвинителство, а веројатно во замена да се запре истрагата за случајот „Софтвери“ каде што тој е првообвинет.
Рашковски во писмената реакција поставува контрапрашање дали го отворила овој случај со цел да ги добие овие унапредување.
Исто така, бара Русковска да каже со име и презиме кој е тој што ја дал понудата.
„Не заради себе, туку заради јавноста која веќе две години ја труете со овој тип обраќање кон неа, вие мора да дадете одговор: Кој, со име и презиме, Ви понудил да станете заменик-јавен обвинител и вашиот внук да биде избран во Вишото јавно обвинителство во замена за тоа да ја сопрете истрагата за случајот ’Софтвери‘, кога тоа се случило и на кое место и, најбитно, ако тоа се случило, што е причината за тој настан, а уште повеќе зошто по речиси две години Вие дури сега кога Ве суспендираа комплет зборувате за тоа?“,
вели Рашковски.
Анализирајќи го синоќешниот телевизиски настап, ексгенералниот секретар на Владата вели дека има четири апсурди во целата ситуација. Првиот, според него, е што постои обвинител што го заменува републичкиот при отсуство, но таква позиција според законот не постои.
„Апсурд 2 – велите ’можеби тоа беше причината‘ алудирајќи на тоа дека позициите за Вас и за внукот кои Ви биле понудени биле за да се откажете од истрагата за случајот ’Софтвери‘. На која Вилма треба да ѝ веруваме, на онаа која вели дека некој и пристапил со конкретен предлог или на онаа која по 2 минути кажува дека можеби тоа била причината.
„Апсурд 3 – велите ’не сакам после да се најдам на суд за клевета и навреда… ‘ Па ако е вистина тоа што го зборувате, зошто би Ве дал некој на суд, а особено ’истакнат‘ правник како Вас не треба да се плаши од одење по судови. Каков борец сте за правда ако се плашите да одете на суд за клевета и навреда?“,
пишува Рашковски во реакцијата.
Како четврта апсурдна ситуација тој наведува дека Русковска пред две години изјавувала дека нема никакви притисоци, за разлика од сега.
За обвинителката Вилма Русковска, која беше шефица за гонење организиран криминал и корупција, Дисциплинска комисија предложи разрешување поради начинот на кој се постапувало во случајот со претресот во рамки на предистрагата за поранешниот директор на Управата за финансиска полиција. Меѓутоа, обвинителката синоќа посочи дека смета оти со ова ја „фатиле на пенал“, а чекале такво нешто уште од отворањето на случајот за Рашковски.
„Пријавата беше само за поранешниот директор (Арафат Муареми). Би сакала да одговорам дека во аналите на македонското правосудство ќе влезе дека за наредба за претрес од суд, која е уште во сила, одговара обвинител што досега ниту се случило ниту во иднина мислам дека ќе се случи. Можам да кажам дека оваа одлука ја очекував. Не сум изненадена воопшто. Само сакам да кажам дека уште кога се отвори истрагата за господинот Драги Рашковски, мене ми беше понудено да ме изберат за заменик-републички обвинител. Кога не го прифатив тоа, го зголемија влогот и понудија покрај мој избор за заменик-републички обвинител, и внукот од сестра ми, кој е обвинител во Куманово, да биде избран во Вишото во Скопје. Јас и тоа го одбив“,
рече Русковска синоќа во емисијата „Топ тема“ на Телма ТВ.
Детали од нејзиното гостување можете да прочитате на линкот во продолжение.