Претседателот Радев во изјава за медиумите по завршувањето на седницата на советот за национална безбедност наведе седум препораки до извршната и законодавната власт во однос на натамошните чекори за решавање на спорот со Северна Македонија
Претседателот на Бугарија, Румен Радев, по завршувањето на денешната седница на Консултативниот совет за национална безбедност, порача дека Северна Македонија не го направила она што е потребно за спроведување на договорот за добрососедство потпишан во 2017 година, како и тоа дека не гарантирала исполнување на обврските од истиот.
„Давањето согласност за почеток на преговорите за членство во ЕУ на РС Македонија не треба да биде врзано со рокови, туку со реални резултати, вклучително и во однос на правата на македонските Бугари. Ние никогаш не сме го негирале и не го негираме правото на граѓаните на РСМ да се определат врз основа на сопствената самосвест и да ги користат јазиците во согласност со Уставот. Во исто време, Бугарија бара целосна рамноправност на македонските Бугари со останатите народи наведени во нивниот Устав. Децениската политика на дискриминација на македонските Бугари, 120 000 луѓе кои се бугарски државјани, а со тоа и државјани на ЕУ, во последно време ескалира во отворен јавен ннапад и врз граѓани декларирани со бугарска свест“,
изјави Радев.
Претходно бугарскиот премиер Кирил Петков, во неколку изјави, споменуваше рок од шест месеци во кој очекува резултати во дијалогот со С Македонија, преку работни групи кои во тој временски период ќе работат на интензивирање на билатералните односи во повеќе области.
Бугарскиот претседател истакна и дека правата на медонските Бугари се клучна точна во копенхашките критериуми за членство во ЕУ за кои не може да се преговара. Радев смета дека од особена важност се проектите за обезбедување транспортна и дигитална инфраструктура, со акцент на Коридорот 8.
Претседателот Радев во изјава за медиумите по завршувањето на седницата на советот за национална безбедност наведе седум препораки до извршната и законодавната власт во однос на натамошните чекори за решавање на спорот со С Македонија и тоа:
- При водењето на надворешната политика на земјата, Министерскиот совет (Владата) да ја запази националната позиција на Бугарија, почитувајќи ги барањата од Договорот во 2017 година, Рамковната позиција од 2019 година и Декларацијата на 44-то Народно собрание;
- Давањето согласност за почеток на преговорите за пристапување на РСМ во ЕУ не треба да биде врзано со рокови туку со реални резултати, особено во однос на македонските Бугари;
- Извршната власт да продолжи да работи на известување за спроведувањето на Договорот од 2017 година во преговарачкиот процес за членство во РСМ во ЕУ;
- Извршна власт да подготви и обезбеди акционен план со мерки за постигнување опиплив напредок во сите области на билатералните односи;
- Извршната власт да им предложи на партнерите на PCM формирање на заеднички работни групи во области во согласност со Договорот од 2017 година;
- Извршните власти да преземат мерки за забрзување на изградбата на Коридорот бр.8 заедно со РСМ и Албанија, како единствен проект – автопат, железница, енергетско и дигитално поврзување;
- Националното собрание треба да му предложи на законодавното тело на РСМ воспоставување структуриран дијалог меѓу групите за пријателство и парламентарните комисии, со што би се зајакнала довербата и би се поддржал севкупниот процес.
Седницата на совет за национална безбедност свикан од претседателот Румен Радев за прашањето за евроинтеграциите на Северна Македонија траеше повеќе од пет и пол часа, пренесуваат бугарските медиуми.
Претседателот на Бугарија смета дека треба да се забрза процесот на европска интеграција на РСМ, но само со почитување на националниот интерес.
Бугарскиот премиер Кирил Петков на 18 јануари се очекува да го посети Скопје и да оствари средба со мандатарот Димитар Ковачевски.