Работната група ќе работи на решенија кои ќе бидат одржливи и кои нема да ја нарушат стабилноста на Фондот за пензиско и инвалидско осигурување, информираат од Министерството за труд и социјална политика
По вчерашниот протест на пензионерите кои доставија две барања до министерката Тренчевска за зголемување на износот на пензиите и минималната пензија, од МТСП информираат дека на денешниот состанок на министерката Јованка Тренчевска и Сојузот на здруженија на пензионери на Македонија, била донесена одлука да се формира работна група што ќе предложи решенија кои ќе бидат одржливи во однос на утврдување на износот на минимална пензија, но и за други видови мерки за помош и поддршка на пензионерите. Работната група ќе брои членови и претставници од МТСП, Владата, Сојузот на пензионери и ПИОМ.
„Работната група треба да работи на решенија кои ќе бидат одржливи, кои не ја нарушуваат стабилноста на Фондот на пензиското и инвалидското осигурување и кои, пред сѐ, ги почитуваат потребите на пензионерите“,
информираат од МТСП.
Тренчевска на состанокот истакнала дека работата на Министерството за труд и социјална политика со Сојузот во изминатиот период не бил во мирување, туку напротив, во континуитет се работело на решение за утврдување на износ на минимална пензија.
Министерката посочила и дека во претстојниот период ќе се интензивираат средбите со пензионерите во сите градови во државата, како можност за давање предлози кои ќе бидат основа во креирање решенија и предвидување на потребните законски измени за барањата да бидат реалност.
Тренчевска на крајот од средбата истакнала дека Министерството ќе вети само исполнување на решенија кои навистина ќе можат да се спроведат, затоа што, според неа, зборот даден кон граѓаните секогаш треба да биде целосно реализиран, велат од МТСП.