Белата куќа вчера соопшти дека Вашингтон не е загрижен за патувањето на Путин, туку за продлабочувањето на односите меѓу Москва и Пјонгјанг
Во пресрет на официјалната посета на Пјонгјанг, рускиот претседател Владимир Путин ја пофали Северна Кореја за нејзината поддршка на војната во Украина и најави подигање на односите со една од најизолираните нации во светот на повисоко нив, пишува „Гардијан“.
Инаку, ова е прва посета на Путин на Северна Кореја од 2000 година, за време на која тој ќе има тет-а-тет средба со севернокорејскиот лидер Ким Џонг ун, додека во меѓувреме двајцата најавија дека ќе ја прошират безбедносната и економската соработка, и покрај западните санкции против двете земји.
Путин, како што објави агенцијата Франс прес, се очекува Путин да пристигне во Северна Кореја денеска доцна попладне, придружуван од голем број владини министри и советници, меѓу кои и одговорните за војската и за снабдувањето со оружје. Дел од делегацијата, имено, се и новиот руски министер за одбрана Андреј Белоусов и вицепремиерот задолжен за надгледување на одбранбениот сектор Денис Муратов.
Во колумна за централната новинска агенција на Северна Кореја, Путин ја пофали земјата за цврстата поддршка на војната на Русија во Украина додавајќи оти планира да ги подигне односите со Пјонгјанг на повисоко ниво.
„Агендата е мошне полна… Голем дел од времето ќе биде посветено на неформални контакти меѓу лидерите бидејќи овие преговори ќе ги опфатат најважните и најчувствителните прашања“,
изјави помошникот на Путин за надворешна политика Јуриј Ушаков.
Инаку, ова е едно од ретките патувања на рускиот претседател во странство. Тој ги ограничи патувањата откако ја започна агресијата врз Украина и откако против него Меѓународниот кривичен суд издаде налог за апсење поради обвинувањата за масовна депортација на деца од окупираните делови на Украина во Русија.
Северна Кореја ѝ достави на Русија милиони парчиња артилериска муниција од советската ера, како клучна помош и поддршка за руската воена кампања врз Украина. Американскиот секретр за одбрана Лојд Остин минатиот месец пред Конгресот изјави дека испораките на муниција и проектили од Северна Кореја, како беспилотните летала од Иран и помогнале на руската војска „да застане на нозе“.
Пјонгјанг, исто така, ѝ обезбеди на Русија балистички ракети и електронска опрема што Москва ги користи во војната.
За возврат се верува дека Русија на Северна Кореја ѝ обезбедила помош за нејзината сателитска програма, како и друго оружје, економска и дипломатска поддршка, пишува „Гардијан“.
Севернокорејскиот лидер лани го посети далечниот исток на Русија и имаше средба со Путин во Владивосток, каде што заедно ја посетија фабриката за производство на современи борбени авиони и космодромот „Восточни“.
Белата куќа вчера соопшти дека Вашингтон е загрижен поради сè поблиските врски меѓу Русија и Северна Кореја.
„Не сме загрижени за патувањето (на Путин)… Она за што сме загрижени е продлабочувањето на односите меѓу овие две земји“,
изјави вчера портпаролот на Советот за национална безбедност на Белата куќа, Џон Кирби.
Кирби рече дека загриженоста не е само поради тоа што севернокорејските балистички ракети сè уште се користат за гаѓање украински цели, туку затоа што може да има некаков реципроцитет што може да влијае на безбедноста на Корејскиот Полуостров.