Британската кралица Елизабета Втора побарала нејзиниот роденден да биде одбележан без почесна плотунска стрелба, објави „Ај-ти-ви њуз“ повикувајќи се на извор од кралската палата.
Таа на 21 април треба да го прослави својот 94. Роденден.
Кралицата, како што тврди телевизијата, сметала дека тоа не е соодветно со оглед на кризата предизвикана од пандемијата на коронавирус. Ова ќе биде првпат во нејзиното 68-годишно владеење, роденденот да помине без истрелување на артилериски плотуни.
Истовремените стрелби од неколку огнострелни оружја од различни локации во Лондон, кралското семејство вообичаено ги користи за посебни настани, како годишнини и родендени.