Станува збор за група од 23 деца што се запишани во прва година, кои во две смени ќе ја посетуваат оваа настава и кои на крајот на своето образование ќе се стекнат со Б2-сертификат за познавање на италијанскиот јазик
Во гимназијата „Никола Карев“ ќе се изучува италијански како трет јазик во наставата.
Станува збор за група од 23 деца што се запишани во прва година, кои во две смени ќе ја посетуваат оваа настава и кои на крајот на своето образование ќе се стекнат со Б2-сертификат за познавање на италијанскиот јазик.
Италијанска паралелка се отвора првпат во нашата земја на иницијатива на средното училиште „Никола Карев“, а со поддршка на Град Скопје и Амбасадата на Италија.
Запишаните ученици ќе го изучуваат италијанскиот јазик со 6 часа неделен фонд. Тие ќе имаат можност да изучуваат италијанска книжевност, култура, историја и уметност, а по завршувањето на четиригодишното образование, ќе се стекнат со сертификат за познавање на јазикот со ниво Б2. На тој начин на учениците што следеле настава во италијанската паралелка им се овозможува полесно да се запишат на некои од универзитетите во Република Италија.
Градоначалникот Петре Шилегов и министерката за образование, Мила Царовска, денеска ги посетија средношколците во гимназијата посакувајќи им многу успеси во учењето и во нивниот личен и професионален развој. На посетата на гимназијата „Никола Карев“ присуствуваше и амбасадорот на Италија во нашата земја, Андреа Силвестри.
Ова достигнување е резултат на Одлуката на Владата од 6 март 2018 година со која италијанскиот јазик беше воведен како втор изборен странски јазик во основните и средните училишта.
„Во Северна Македонија расте ‘побарувачката’ за италијански, што е во согласност со историско добрите односи меѓу нашите народи, како и со заложбите за зајакнување на економската и трговската размена. Италијанскиот јазик впрочем, освен што е јазик на културата и уметноста, нуди и значајни професионални можности, особено во една толку блиска земја како што е Северна Македонија“,
рече италијанскиот амбасадор.
Амбасадорот им подари на учениците и на присутните маички и нотес посветени на Данте, како симболичен гест во рамките на овогодинешните активности посветени на одбележување на 700 години од смртта на овој голем поет, основоположник на италијанскиот јазик.