Министерот за европски прашања смета дека каков било добронамерен предлог или порака во овој момент може да се искористи за политички маркетинг во предизборието во Бугарија
Засега немаме конкретен план што би успеал, но работиме на одредени насоки кои даваат надеж дека веднаш откако ќе се формира политичка влада во Бугарија ќе имаме забрзан евроинтеграциски процес.
Ова е одговорот на министерот за европски прашања Орхан Муртезани, во интервју за „360 степени“ на МРТ 1, на прашањето – што направи владата на ВМРО-ДПМНЕ, „Вреди“ и ЗНАМ во првите 100 дена за еден од трите клучни столба што си ги одредија – забрзани евроинтеграции.
„Нашата иницијална намера беше да се скрати временскиот рок за прво, да се смета како апсолутен приоритет и второ, во првите шест месеци ние да ги направиме сите внатрешни и надворешни консултации со нашите стратешки партнери за да создадеме дополнителна динамика. Такви напори имаше и внатре во коалицијата и на нашите состаноци со високите претставници на институциите во Брисел и пошироко. Сега-засега не можам да кажам дека имаме конкретен план што би успеал, меѓутоа се работи на одредени насоки што даваат надеж и треба да се прецизираат и материјализираат откако нашиот сосед Бугарија ќе има стабилна политичка влада“,
рече Муртезани.
Според него, каков било добронамерен предлог или порака во моментов може да се користи за политички маркетинг во предизборието на Бугарија.
Прашан дали во рокот од шест месеци, што самите го споменуваат, ќе стигнат барем до план за деблокада на пристапниот процес кон ЕУ, министерот за европски прашања одговара дека тоа ќе зависи од формирањето на политичка влада во Бугарија.
„Тоа зависи многу од тоа дали ќе има политичка влада во Бугарија бидејќи тоа е клучно во процесот на дијалогот. Меѓутоа, сега-засега сигурно дека стоиме на тоа (рокот од шест месеци, н.з.)“,
вели Муртезани.
Тој отфрла каква било поврзаност на локалните избори во Македонија кои треба да се случат во есента 2025 година со евроинтегративниот процес и дополнува дека напредувањето на Украина, Молдавија и Албанија покажува дека треба да се искористи поволниот бран.
„Мислам дека погрешна е логиката локалните избори да ги мешаме со стратешката ориентација на државата. Стратешката определба на државата бара од нас да работиме константно, особено кога ни се дава можност брзо да напредуваме напред. А таа можност сега се потврдува и со Албанија, со Украина и Молдавија и е шанса која ние мора да ја искористиме“,
изјави Муртезани во интервју за 360°.