Русија во меморандумот што денеска им бил предаден на украинските преговарачи во Истанбул, исто така, го условува крајот на војната со меѓународно правно признавање на Крим и регионите Донецк, Луганск, Запорожје и Херсон, кои се анектирани и кои Москва ги смета за дел од својата територија
Пред да прифати сеопфатен прекин на огнот Русија бара Украина првин да ја повлече својата војска од четирите региони што ги анектираше Москва и кои ги смета за дел од руската територија. Ова е дел од рускиот меморандум за ставање крај на војната што денеска ѝ бил предаден на украинската делегација во Истанбул, а чија содржина ја објавија руските новински агенции, пренесуваат светските медиуми.
Според овој документ, Москва бара целосно повлекување на украинската армија од делумно окупираните региони Донецк и Луганск, на исток, и Запорожје и Херсон, на југ, пред да стапи во сила 30-дневниот прекин на огнот.
Русија, како што се наведува, исто така го условува крајот на војната со меѓународно правно признавање на тие региони и Крим, кој Москва го анектираше во 2014 година, како руска територија.
Во меморандумот се бара и укинување на економските санкции кон Москва, како и Украина да се откаже од барањето за воени репарации од Русија.
Во објавениот документ, исто така, се споменува „неутралноста“ на Украина, потоа забраната за распоредување на странски воени формации, воени бази и воена инфраструктура на нејзина територија и повлекувањето на украинската армија на договорено растојание од границата со Руската Федерација.
Руските новински агенции ТАСС и Риа новости известуваат дека документот, напишан на три страници, исто, повикува на прекин на снабдувањето на Киев со западно оружје и споделување на разузнавачки податоци, како и забрана за распоредување на нуклеарно оружје во Украина.
Понатаму, Москва бара Украина да ги ослободи, како што се наведува, политичките затвореници, како и воените и цивилните затвореници кои се наоѓаат во украинските затвори. Едно од барањата наведени во меморандумот е и почитување на „правата, слободите и интересите на населението кое говори руски јазик“.
Во документот Русија инсистира и на она што го нарекува „денацификација“ на Украина, односно меморандумот предвидува распуштање на „украинските националистички формации“ во рамките на вооружените сили.
Овие барања на Русија не се нови. Тие досега неколкупати беа повторувани од властите во Москва и секогаш наидуваа на отфрлање од страна на Киев, со став дека станува збор за максималистички барања.
Втората рунда мировни преговори меѓу Русија и Украина, што се одржа денеска во Истанбул, заврши за околу еден час.
На преговорите им претходеше голем украински напад со беспилотни летала врз руските воздухопловни сили и стратешките бомбардери.
Украинскиот министер за одбрана Рустем Умеров по денешните разговори во Истанбул со руските преговарачи изјави дека страните се согласиле за размена на затвореници што ќе се фокусира на тешко повредените и оние под 25 години.
Умеров од Истанбул рече и дека како дел од размената ќе бидат вратени и посмртните останки на загинатите војници.
Според него, на средбата се разговарало и за потенцијална средба меѓу украинскиот претседател Володимир Зеленски и рускиот претседател Владимир Путин, на која евентуално би можел да учествува и американскиот претседател Доналд Трамп, а која би можело да се случи на крајот на месецот.
Според неофицијални извори, Киев наводно предложил средбата меѓу Путин и Зеленски да се одржи помеѓу 20 и 30 јуни.
По завршувањето на средбата се огласи и украинскиот претседател Володимир Зеленски, кој наведе дека се подготвува нова размена на воени заробеници.
Руската и украинската делегација денеска се состанаа за да ги презентираат своите предлози за тоа како треба да изгледа целосен прекин на огнот и долгорочен пат кон мир, под притисок од американскиот претседател Доналд Трамп, кој рече дека САД би можеле да се повлечат од улогата на медијатор доколку не се постигне напредок.