До крајот на 2026 година, како што рече премиерот, согласно ветувањата во изборната кампања, автопатот Кичево – Охрид ќе биде целосно пуштен во употреба
Првата половина од автотпатот Кичево – Охрид, со исклучок на мал дел кај селото Ботун, се очекува да биде пуштена во употреба во мај следната година, најави премиерот Христијан Мицкоски на денешната прес-конференција по повод 100 дена од работата на новата Влада.
Во оваа насока премиерот додаде дека двата „фамозни“ километри од автопатот кон Блаце се завршени и наскоро ќе бидат пуштени во употреба.
„Остануваат да се реализираат уште 10-ина километри. Имаме јасен план како тоа да се реализира преку Јавното претпријатие за државни патишта. Тој проект наскоро ќе почне со реализација“,
рече Мицкоски во одговор на новинарско прашање.
До крајот на 2026 година, како што рече Мицкоски, согласно ветувањата во изборната кампања, автопатот Кичево-Охрид ќе биде целосно пуштен во употреба.
„Од онаа катаклизмична состојба што ја наследивме се случуваат големи поместувања. Оставена е страшна состојба и со проектите поврзани со коридорите 8 и 10-д за кои освен авансот од 300 милиони евра, буквално немаше никаков прогрес. Немаше ниту еден отсто прогрес направен од европејциве и прозападниве на кои од европското изгледа само еврото им било важно“,
вели Мицкоски.
Премиерот најави и привршување на изградбата на експресниот пат Чатал-Длабочица-Крива Паланка, кој е дел од Коридорот 8 и треба да го поврзе Куманово со граничниот премин „Деве Баир“. Привршуваат, како што кажа, и работите на експресниот пат Градско-Росоман-Фариш и се очекува до крајот на годината да биде пуштен во употреба.