Пожарот изби во петокот, по четири часот наутро, од сè уште непознати причини, додека италијанскиот траект „Еурофери Олимпиа“ пловел во морскиот дел североисточно од островот Ерикуса, а тргнал од Игуменица за Бриндизи
Веќе четврти ден продолжува потрагата и спасувачката акција за пронаоѓање на десет исчезнати патници по пожарот што во петокот наутро избувна на траектот „Еурофери Олимпиа“, додека од Грција пловел кон Италија, јави дописничката на МИА од Атина.
Според грчките медиуми, меѓу исчезнатите се седум бугарски државјани, двајца Грци и еден Турчин, веројатно сите шофери на камиони.
Траектот сè уште не е извлечен на пристаниште, со оглед на тоа дека и понатаму чади.
Во текот на вчерашниот ден беше спасено едно лице и извлечено безживотното тело на еден патник.
По над 50 часа поминати во гаражата на траектот, вчера наутро 21-годишен возач на камион, сам успеал од гаражата да стигне до палубата, од каде што бил преземен од спасувачките екипи, а потоа и превентивно пренесен во болница, пренесуваат грчките медиуми.
Според овие информации, вчера во попладневните часови, припадници на противпожарната служба на Грција извлекле и безживотно тело на маж, што воедно е и првата жртва од пожарот
Пожарот изби во петокот, по четири часот наутро, од се уште непознати причини, додека италијанскиот траект „Еурофери Олимпиа“ пловел во морскиот дел североисточно од островот Ерикуса, а тргнал од Игуменица за Бриндизи.
Според официјалниот список, имало 239 патници и 51 член на екипажот, како и автомобили и камиони.
Дополнително произлезе дека меѓу спасените се и две лица, веројатно мигранти кои патувале нелегално, без билет.
Спасени се вкупно 281 лице, десет се водат за исчезнати, а еден патник го загуби животот.