Борел истакна дека од средбата не треба да се очекуваат одлуки бидејќи се работи за неформален состанок, а тие најчесто се посветени на подлабоки политички дискусии, а не на носење конкретни одлуки
Високиот претставник на ЕУ за надворешна политика и безбедност, Жозеп Борел, денеска ги покани министрите за надворешни работи на земјите членки на ЕУ на состанок во Киев. Тоа ќе биде прва таква средба што ќе се одржи надвор од ЕУ.
„Свикуваме историски состанок на министрите за надворешни работи на ЕУ овде во Украина, земја кандидат и идна членка на ЕУ. Тука сме да ја изразиме нашата солидарност и поддршка за украинскиот народ“,
напиша Борел во објавата на мрежата „Икс“.
We are convening a historic meeting of EU Foreign Ministers here in Ukraine, candidate country and future member of the EU.
— Josep Borrell Fontelles (@JosepBorrellF) October 2, 2023
We are here to express our solidarity and support to the Ukrainian people.https://t.co/zcv6agCcIy
Шефот за надворешна политика на Украина, Дмитро Кулеба, го поздрави собирот за кој рече дека се одржува во „идните граници“ на Унијата.
„Мило ми е што ги поздравувам министрите за надворешни работи на ЕУ на историскиот состанок во Украина. За прв пат во историјата, надвор од сегашните граници на ЕУ. Но, и во нејзините идни граници. Благодарен сум и на Европската Унија и лично на Жозеп Борел за непоколебливата поддршка на ЕУ за Украина“,
напиша Кулеба на Твитер.
Glad to welcome EU foreign ministers at the historic meeting in Ukraine. For the first time in history, outside current EU borders. But also within its future borders. I am grateful to the European Union and personally to @JosepBorrellF for the unwavering EU support for Ukraine. pic.twitter.com/xPjPVExp3S
— Dmytro Kuleba (@DmytroKuleba) October 2, 2023
Борел истакна дека од средбата не треба да се очекуваат одлуки бидејќи се работи за неформален состанок, а тие најчесто се посветени на подлабоки политички дискусии, а не на носење конкретни одлуки.
Запрашан дали на состанокот ќе биде донесена одлука за доделување помош од 20 милијарди евра за Украина, тој наведе дека одлуката ќе биде донесена, но не прецизираше кога.
„Нашата поддршка не зависи од тоа како ќе се одвива војната во следните денови и недели. Мораме да обезбедиме постојана и структурна поддршка бидејќи се соочуваме со егзистенцијална закана за Европа“,
изјави Борел во Киев во пресрет на состанокот.
Според дипломатски извори, како што јави дописникот на МИА од Брисел, главни теми на средбата се очекува да бидат евроинтеграцијата на Украина и преземање на некои итни мерки за поддршка на земјата, како што е испраќање воена помош и дополнително заострување на санкциите кон Москва.
Покрај неформалниот состанок на кој ќе присуствува и украинскиот министер за надворешни работи Дмитро Кулеба, шефовите на дипломатиите на земјите членки на ЕУ се очекува да се сретнат и со претседателот на Украина, Володимир Зеленски.
Борел во саботата ненајавено го посети украинскиот пристаништен град Одеса на Црното Море, каде што ја осуди, како што рече, „варварската“ штета предизвикана од неодамнешните руски напади врз градот.
Тој при тоа одново упати критики на сметка на Москва поради прекинот на договорот за жито.
„И покрај сето тоа, Украина продолжува да биде најголемиот снабдувач со жито на Светската програма за храна, а тоа е уште една причина да продолжиме да ја поддржуваме Украина“,
додаде Борел.