Првите четири години како лидер, Мицкоски ги помина во опозиција. Неговите противења на билатералните договори што ги постигна Владата со Грција и со Бугарија, како и изборните порази што ги прокнижи, доведоа до формирање повеќе струи во ВМРО-ДПМНЕ кои во повеќе наврати бараа оставка од Мицкоски. Сепак, резултатот што ВМРО-ДПМНЕ го постигна на локалните избори во октомври ги зајакна позициите на Мицкоски пред денешниот 17.конгрес
Христијан Мицкоски е пред реизбор на чело на ВМРО-ДПМНЕ, на денешниот партиски изборен конгрес во салата „Јане Сандански“ во Скопје.
Првпат по три децении партијата одржува конгрес во главниот град, за разлика од пред четири години кога Мицкоски првпат беше избран на функцијата на (вонреден) конгрес на партијата во Валандово.
Мицкоски е третиот на чело на ВМРО-ДПМНЕ, по Љубчо Георгиевски и Никола Груевски.
Георгиевски беше трипати избиран за претседател на ВМРО-ДПМНЕ, на конгреси во Прилеп, Кичево и во Струмица, во периодот од 1991 до 2002 година, кога кога поднесе оставка поради поразот на тогашните парламентарни избори. Нешто подоцна Геориевски ја формираше ВМРО-НП која денеска е дел од коалицијата на СДСМ.
Груевски е вториот на чело на ВМРО-ДПМНЕ, кој првпат беше избран на конгресот во Охрид во 2003 година, кој е можеби единствениот досега на кој за лидерската функција во партијата се натпреваруваа двајца (негов противкандидат беше Марјан Ѓорчев). Тој потоа беше реизбиран на функцијата на конгреси во Битола, Штип и во Куманово во 2015 година. Кон крајот на 2017 година поднесе оставка, по апсењата за насилствата во парламентот на 27 април истата година.
Првите четири години како лидер, Мицкоски ги помина во опозиција, губејќи ги претседателските избори во 2019 година и ланските парламентарни избори. Неговите противења на билатералните договори што ги постигна Владата со Грција и со Бугарија, посебно на Преспанскиот договор, како и изборните порази што ги прокнижи, доведоа до формирање повеќе струи во ВМРО-ДПМНЕ кои во повеќе наврати бараа реформи во партијата и оставка од Мицкоски.
Сепак, резултатот што ВМРО-ДПМНЕ го постигна на локалните избори во октомври годинава, освојувајќи најмноги гласови и градоначалнички места, ги зајакна позициите на Мицкоски во партијата, додека неговиот главен противник во изминатите четири години, премиерот и лидер на СДСМ, Зоран Заев поднесе оставка, така што денеска ќе биде избран и неговиот наследник во владејачката партија.
Мицкоски и на 17. конгрес на ВМРО-ДПМНЕ е единствен кандидат за лидер.
ВМРО-ДПМНЕ најави неодамна големи кадровски промени и нова доктрина, по конгресот што денеска ќе заврши најверојатно со реизбор на Мицоски. Од партијата најавија и дека нема да потпишат и да поддржат евентуален договор со Бугарија што би излегол од рамките на Резолуцијата изгласана во јули годинава во Собранието за црвените линии во преговорите.