Коалициските лидери Мариника Тепиќ и Мирослав Алексиќ најавија штрајк со глад
Граѓански протест се одржува вечерва во Белград, пред Градското собрание, во организација на коалицијата „Србија против насилството“. Учесниците на протестот бараат поништување на белградските избори поради, како што велат, бројни нерегуларности, пренесува РТС.
Коалициските лидери Мариника Тепиќ и Мирослав Алексиќ најавија штрајк со глад.
Граѓаните заедно со лидерите на коалицијата „Србија против насилството“ дојдоа во зградата во која е сместена Републичката изборна комисија и бараат повторување на изборите во Белград.
Лидерите на коалицијата „Србија против насилството“ вечерва до Републичката изборна комисија треба да достават докази за наводни нерегуларности на белградските избори, а носителот на изборната листа на таа коалиција, Мариника Тепиќ најави дека таа и нејзиниот колега Мирослав Алексиќ ќе започнат штрајк со глад до поништување на изборите.
Тепиќ рече дека дошле пред РИК, кое е второстепено тело на изборите во Белград, бидејќи „луѓе од друга земја со злоупотреба одлучувале за изборите во Белград“.
„Имаме докази и бараме поништување на изборите, а јас и Алексиќ, престојувајќи во РИК, ќе започнеме штрајк со глад до поништување на изборите“,
најави Тепиќ.
Кандидатот за градоначалник на Белград од листата „Србија против насилството“, Владимир Обрадовиќ, рече дека не ги прифаќаат резултатите од изборите во Белград поради бројни нерегуларности со образложение дека не бараат повторување на некои избирачки места, туку поништување на целиот изборен процес во Белград и негово повторување.
Пред Републичката изборна комисија беа поставени барикади со српски знамиња, а пред вратата беа униформирани полицајци.
При пристигнувањето пред зградата во која е сместено седиштето на РИК, учесниците на протестот се обидоа да ја пробијат заштитната ограда. Ситуацијата на моменти беше многу тензична, но немаше сериозни инциденти.
Српската Републичка изборна комисија сè уште ги брои гласовите и до 21 часот треба да излезе со прелиминарни резултати.
Вучиќ и СНС уште од синоќа прогласија апсолутна победа на овие избори.