Со маски и држење дистанца, годинава треба да помине одбележувањето на Илинден во Крушево. Градот ги доби протоколите за прославата од Министерството за здравство и Комисијата за заразни болести, а градоначалникот Томе Христоски, кој е и претседател на манифестацијата „10 дена Крушевска Република“, најави дека ќе се прославува без големи собири, поскромно, ама достоинствено.
Во Крушево за Илинден ќе биде и претседателот на Собранието, Талат Џафери.
„Протоколите детално ги објаснуваат безбедносните мерки при прославата. Секако дека ќе им се оддаде почит и ќе се положат свежи цвеќиња на илинденците и на хероите, на месноста Слива, во ‘Македониумот’ каде што е гробот на претседателот на Крушевската Република, Никола Карев, на Мечкин Камен, каде што е централната прослава. Ќе има обраќање, годинава заедно со Крушево, домаќин на прославата е републичкото Собрание и се очекува обраќање на претседателот на Собранието Талат Џафери. Ќе има гости: владини претставници, од политичките партии, од дипломатскиот кор, но, се ќе биде според протоколот за држење растојание, носење заштитни маски, дезинфекција. Полагањата ќе бидат побрзи, на растојание. Вечерта на први август на Гумење, традиционално ќе бидат отворени „10 дена Крушевска Република“ со подигнување на бајракот на Републиката, достоинствено, но манифестацијата ќе нема културни настани за да се избегнат групирањата. Ќе пристигнат коњаниците кои треба да тргнуваат од понеделник“,
објаснува Христоски.
Секој што сака може да дојде во Крушево на одбележувањето на 2 Август, порачуваат, но со спроведување и почитување на заштитните мерки.
„Редари ќе се грижат да се почитува растојанието, ама и ги замолувам граѓаните да се придржуваат на редот и протоколот. Секако и пристигнувањето и заминувањето од Крушево ќе биде според пропишаните протоколи за транспорт“,
вели Христоски.
Празникот ќе се одбележи и во Скопје и во Пелинце. На церемонијата во главниот град ќе присуствува техничкиот премиер Оливер Спасовски, додека претседателот Стево Пендаровски ќе биде во Пелинце.