Тројца проректори на Универзитетот „Свети Кирил и Методиј“ во Скопје вечерва преку писмо му се обратија на ректорот Никола Јанкуловски дека погрешно ги интерпретира законите и нивните укажувања со цел да се организира избор за ректор каде тој е кандидат.
„Во контекст на прашањето на избор на ректор и спроведување на постапката, не само од законски, туку и од етички причини, недопустливо е Вие повторно да се ставите во улога на претседател на Сенатот и да изберете Универзитетска изборна комисија, лично да ја потпишете одлуката и да и дадете мандат да ги состави правилата за избор и да го спроведе изборот, и притоа исто така вие да бидете кандидат за ректор“,
се вели во реакцијата од проректорите.
Во образложението тие укажуваат дека Јанкуловски во јавноста манипулира со ставот дека Сенатот нема никаква врска со изборот на ректор, туку дека за тоа гласа академската заедница, но притоа, намерно пропушта да каже дека Сенатот врши избор на комисијата за спроведување на избори.
„Согласно Законот таа ги спроведува изборите и е единствена надлежна за утврдување на правилата за избор, а како крајна инстанца и за решавање на евентуалните жалби и сл. Тоа значи дека изборите се во комплетна надлежност на Универзитетската изборна комисија“,
велат проректорите.
Третата работа за која проректорите му забележуваат на Јанкуловски е тоа што намерно не избира претседател на Сенатот и наместо тоа тој претседава со Сенатот, закажува седници и ги потпишува одлуките на ова тело.
„Неспроведувајќи го Законот за високото образование (Службен весник на РМ, бр. 82 од 8.05.2018; членовите 161, 162 и 167) и Статутот на Универзитетот (Универзитетски гласник, бр. 425 од 28 јуни 2019; членовите 151 и 212), Вие свесно не сакате да изберете претседател на Сенатот. Согласно горенаведените членови, Вие не смеете да бидете член на сенатот, да закажувате седници на Сенатот, да претседавате со Сенатот, да гласате и да ги потпишувате одлуките. Грубо кршејќи го Законот, од неговото донесување на 8 мај 2018 год., Вие свесно и намерно правите противправни дејствија на Универзитетот, со тоа што не избирате претседател на Сенатот“,
велат проректорите во писмената реакција.
Претходно и Независниот академски синдикат (НАкС) го обвини ректорот на Универзитетот „Св. Кирил и Методиј) (УКИМ), професорот Никола Јанкуловски, дека ја брза постапката за избор на ректор во вонредна состојба и бара изборот да се одложи за помирни времиња. Јанкуловски, пак, смета дека таа е во согласност со Законот за високо образование, а обвинувањата според него се невистинити видувања на изолиран број на припадници на академската заедница на УКИМ.