Судскиот совет до крајот на оваа недела треба да ја разгледа и да ја усвои методологијата, која на 28 декември би се нашла на седница на Советот за реформи во правосудството, најавува министерот Маричиќ
Методологијата за филтрација на судството и на обвинителството е при крај, соопшти денеска министерот за правда Бојан Маричиќ, по повод првите 100 дена на новата влада на СДСМ и на ДУИ.
Тој рече дека очекува Судскиот совет до крајот на оваа недела да ја разгледа и усвои методологијата, која на 28 декември би се нашла на седница на Советот за реформи во правосудството, а по нејзиното донесување и крајно утврдување ќе биде објавена за јавноста.
Маричиќ наброи, како што рече, „мал дел од критериумите за филтрирање“:
- Утврдување дали има неоправдано одложување на рочишта од страна на судиите;
- Непочитување или пречекорување на законските рочишта;
- застарување на гонење или на извршување на санкциите во кривичните предмети;
- Неправилна одлука или приговор за застареност од странките.