Производите во есенската кошничка еден месец ќе бидат со ограничена маржа, но нема замрзнување на цените, вели Дурмиши

Дел од производите што ќе бидат опфатени со мерката, Дурмиши рече дека се лебот, пекарските и млечните производи, овошјето, зеленчукот

Производите што ќе се најдат на листата за во есенската кошничка ќе бидат со ограничена бруто профитна маржа до 10 отсто, а не со замрзнати цени, најави денеска министерот за економија и труд Бесар Дурмиши.

Според Дурмиши, за оваа мерка на владина седница најверојатно ќе се разговара наредната недела.

Дел од производите што ќе бидат опфатени со мерката, Дурмиши рече дека се лебот, пекарските и млечните производи, овошјето, зеленчукот.

„Оваа мерка ќе биде краткорочна и во сила еден месец. Праксата на нејзиното донесување ќе продолжи за новогодишните и сите следни празници“,

рече министерот.

Граѓаните ќе полнат есенска, предновогодишна и пролетна кошничка – ќе се намалуваат цените на производите што најмногу се трошат

Премиерот Христијан Мицкоски, исто така, денеска рече мерката, за која вели дека е резултат на постигнатиот договор на надлежните со производителите и маркетите, ќе биде на разгледување на следната владина седница.

„Имаше вчера предлог од Министерството за економија и труд кој беше резултат на средбата што ја имаа со производителите и со маркетите. Беше постигнат договор и истото тоа ќе биде на следната владина седница. Вчера не беше поради определени технички причини, но сакаме да ги помине оние филтри како генерален колегиум и комисија за економски систем и во вторник да биде на дневен ред“,

рече Мицкоски.

Есенската кошничка со производи што се најупотребувани во овој период од годината, беше најавена минатата недела и оти во неа ќе се најдат ориз, грав, овошје, зеленчук, месо.

Дурмиши: Утре ќе биде готова есенската кошничка со 100 производи – во неа ќе има овошје, зеленчук, ориз, грав, месо

Работна група разгледуваше дали треба да се замрзнат цените на дел од производите или, пак, да се ограничи висината на маржата.

Најавите беа дека предлогот за кој ќе се реши на работната група вчера ќе помине на владина седница и оти веднаш ќе почне неговата примена.

Но, премиерот Мицкоски во понеделникот најави дека за предлозите треба да се разговара со производителите и со трговците за да се најде најдобриот начин за сите да бидат задоволни.

Предлогот за есенската кошничка ќе ги почека разговорите на Владата со производителите и трговците, можно е утре да не биде на седница