По вчерашниот демант на ректорката проф д-р Биљана Ангелова за поднесената пријава за наводното прекршување на Законот од нејзина страна од страна на група професори од УКИМ, денеска тие реагираат на демантот велејќи дека тој е манипулативниот и паушален
Професорите од УКИМ велат дека наводите во Пријавата се засноваат врз јавно достапни информации и во нив може да се уверат и медиумите и севкупната јавност. А со тоа да се уверат и во манипулативноста и паушалноста на „демантот“, односно дека со став 5 од членот 44 од Законот за спречување на корупцијата и судирот на интереси е регулирано дека избрано или именувано лице не може да врши функција на член на управен одбор или на друг орган на управување во трговско друштво или друго правно лице што се занимава со дејност со која се остварува профит.
Во Регистарот на избрани и именувани лица, во согласност со законската регулатива, опфатени се и функциите ректор и проректор. Лицето Биљана Ангелова и лично е регистрирано во овој регистар на Државната комисија за спречување на корупцијата, се вели во реакцијата.
„Членувањето на лицето Биљана Ангелова во органи на управување на трговски друштва, односно правни лица што се занимаат со дејност со која се остварува профит, кај дел од субјектите е наведено на официјална веб-страница и во нивни извештаи, а за некои од ваквите субјекти е наведено и во јавно достапните биографии на лицето Биљана Ангелова, на веб-страницата на Економскиот институт и на веб-страницата на Универзитетот. Сето тоа е проверливо за целата јавност, и покрај обидот за манипулативно демантирање“,
се вели во реакцијата.
Информациите кои упатуваат на склоност на лицето Биљана Ангелова за создавање простор за злоупотреба на службената положба и овластување за лична корист, исто така се јавно достапни. За тоа, меѓу другото, покрај информациите што се објавени и во медиумите, ги наведоа и следните наоди:
Членувањето на лицето Биљана Ангелова како директор на Економскиот институт на државниот Универзитет во Управниот одбор и Академскиот совет на приватната Академија за банкарство и информатичка технологија (АБИТ) кои се наведени на официјалните страни. Потоа, и во офцијалната биографија на лицето Биљана Ангелова на веб-страницата на Економскиот институт е наведено дека „Учествувала во формирањето на Асоцијацијата за банкарство и информатичка технологија“ и дека „е назначена за член на Академскиот одбор“. Очигледно е дека во оваа верзија на биографијата, манипулативно, терминот „академија“ е заменет со „асоцијација“, како и дека не се спомнува „управен одбор“, поради фактот што од позиција на директор на институт на државниот Универзитет, лицето учествувало во работење и водење на приватна академија. Во официјалната биографија на Ангелова за кандидат за ректор, објавена на веб-страницата на Универзитетот било наведено и дека станува збор за академија, иако не е спомнат управен одбор.
„На веб-страницата на приватната Академија, јавноста може да се увери за што станува збор, вклучително и за тоа какви специјализации и за какви износи се нудат. Но и да се увери дека Биљана Ангелова во Управниот одбор и Академскиот совет, застапувајќи го приватниот бизнис интерес, директно соработувала со раководно лице во Народна банка на РМ кое имало важна улога во постапката за издавање на согласноста таа да биде член на Надзорен одбор на ХАЛК БАНКА АД Скопје и во период кога била избрана на функцијата проректор“,
велат професори од УКИМ.
Професорите од УКИМ наведуваат и дека достапни се и информациите за она што за академската заедница е особено страшно – Биљана Ангелова, од позиција на проректор и сега ректор на првиот државен Универзитет вршела и врши настава и на приватни т.н. академии. Податокот дека Ангелова е обучувач на „Прогресив академија“ која е регистрирана како фондација, формирана од МАКПРОГРЕС ДОО Виница е јавно достапен на веб-страницата на т.н. академија.
„Јавно достапна е и информација дека упис на „студенти“ на оваа т.н. приватна академија е вршен и во септември оваа година, при што носечко име во повикот за упис е токму Биљана Ангелова. Уписот бил во тек и кога таа стапи на функцијата ректор“,
велат оттаму.
Според професорите, евидентно е и заобколување на Законот за високо образование. Со тоа, велат оттаму, ректорот Ангелова го злоупотребила името на Универзитетот со испраќањето на демантот со што наведуваат дека Ангелова е подготвена манипулативно да го користи Универзитетот за лични цели и потреби и ја повикуваат да престане со злоупотребата и притисоците за влијание врз институциите.
„Со цел да бидат заштитени работењето и интегритетот на Униврзитетот, уште еднаш апелираме до Државната комисија за спречување на корупцијата за секој од наводите во Пријавата да постапи во согласност со своите надлежности. Притоа, апелираме да ги има предвид и информациите што ги посочуваме во оваа јавна реакција. А по завршување на постапката и јавно да извести за својата одлука по наводите од правен и од етички аспект“,
се наведува во реакцијата.
Универзитетот „Свети Кирил и Методиј“ (УКИМ) вчера преку писмено соопштение ги демантираше наводите на групата универзитетски професори кои, поради сомневање за злоупотреба на службената положба на ректорката Биљана Ангелова, поднесоа пријава против неа до Антикорупциската комисија.
Реакцијата на Универзитетот следува откако во писмото кое го испратија до медиумите, а во кое не беа наведени имињата на потписниците, група професори од УКИМ посочија оти во повеќегодишното работење на Ангелова како проректор таа го прекршила законот со што била дел од надзорен и управен одбор и според нив, создала простор за злоупотреба на службената положба.
Ваквите обвинувања од УКИМ ги оценија за невистинити, велејќи оти по прелиминарниот внатрешен преглед, сите изнесени обвинувања во врска Ангелова се неточни. Посочуваат оти е обесхрабрувачки како името на ректорката и на Универзитетот се вовлекуваат во контроверзии врз основа на потенцијално погрешни информации.
„Ние ги негуваме вредностите на нашата институција за транспарентност, интегритет и потрага по вистината во највисоко почитување. Иако ја разбираме тежината на таквите наводи, императив е да им пристапиме со остроумен ум, потпирајќи се на докажани факти, а не на претпоставки“,
се наведува во реакцијата на Универзитетот.
Од голема важност, посочуваат од УКИМ, е да не се носат опсежни јавни пресуди врз основа на неосновани тврдења, особено кога тие се презентираат анонимно.
„Универзитетот искрено бара од медиумите и јавноста да бидат внимателни и воздржани во ширењето непроверени информации. Дезинформациите или ‘лажните вести’ можат да бидат штетни, а Универзитетот верува во важноста да се постапува одговорно“,
посочуваат од УКИМ во писменото соопштение.
Професорката Биљана Ангелова од Економскиот институт на 15 септември годинава официјално ја презема ректорската функција на Универзитетот „Свети Кирил и Методиј“ во Скопје, а обвинувањата на групата универзитетски професори кон неа се поврзани со периодот во кој таа ја извршуваше функцијата проректор.