Проблемот со платите во АД „Водостопанство“ ќе се надмине, се бара долгорочно решение за претпријатието, вели Ковачевски

На ваков начин како што работи, тешко дека може да се обезбеди рентабилно работење. Затоа ќе мора да се направи реструктурирање на компанијата за точно да се види кои делови носат приходи, а кои се тие што треба да бидат реорганизирани. Тоа не значи дека некој ќе остане без работа, тоа значи дека ресурсите ќе треба да бидат насочени таму каде што најдобро ќе бидат искористени од страна на самата компанија, вели Ковачевски

Премиерот Димитар Ковачевски е убеден дека ќе се надмине проблемот со платите на вработените во АД „Водостопанство“ и најави дека се работи на долгорочно решение за претпријатието, а целта е да се овозоможи негово постојано, рентабилно работење.

Според него, ќе мора да се направи реструктурирање за точно да се види кои делови носат приходи, а кои се тие што треба да бидат реорганизирани. 

„Владата во изминатиот период секогаш преку вицепремиерот за економски прашања, министерот за финансии и министерот за земјоделство успеваше да најде решение за оперативното функционирање на АД ’Водостопанство’ . Убеден сум дека и сега ќе се најде решение, меѓутоа се работи и на долгорочно решение во делот на ова претпријатие со цел да се обезбеди негово постојано, рентабилно работење. На ваков начин како што работи, тешко дека може да се обезбеди рентабилно работење. Затоа, ќе мора да се направи реструктурирање на компанијата за точно да се види кои делови носат приходи, а кои се тие што треба да бидат реорганизирани. Тоа не значи дека некој ќе остане без работа, тоа значи дека ресурсите ќе треба да бидат насочени таму каде што најдобро ќе бидат искористени од страна на самата компанија“,

истакна Ковачевски одговорајќи на новинарско прашање по увидот на градежните работи на „Љубљански мост“ во Скопје. 

Вработените од АД „Водостопанство“ бараат решение за исплата на платите, во спротивно од понеделник излегуваат на протести пред Влада

Според премиерот, АД „Водостопанство“ е исклучително значајна компанија зашто се грижи за снабдувањето со вода, пред сè, во земјоделството.

„Се работи за компанија која е изложена на големи трошоци и од аспект на инфраструктурно одржување на водоснабдителните системи и од аспект на оперативно работење – голем број вработени, наплата која не е на соодветно ниво, што исто така го отежнува нивното работење“,

рече Ковачевски.

Вработените од АД „Водостопанство“ денеска побараа Владата итно да изнајде решение со кое ќе им се гарантира исплатата на плати. Плата, како што рекоа, не зеле за јули, а според најавите што ги имаат од раководтсвото на претпријатието, неизвесно е дали ќе земат и во следните месеци, до крајот на годината. Доколку не добијат конкретен одговор во најкус можен рок, од понеделник, како што најавија, ќе организираат протести пред Владата.