Од МВР велат дека биле пронајдени 78 пакувања со марихуана, кеса со марихуана, бела прашеста материја, дигитална вага, пари и други предмети со остатоци од наркотична дрога
Во скопската населба Карпош вчера биле лишени од слобода две лица кои биле затекнати како во стан пакуваат марихуана. Во полициска станица е задржано и уште едно лице кое било затекнато пред зградата каде што биле другите двајца, а кај кое биле пронајдени пари за кои постои сомнение дека потекнуваат од кривично дело, информираат од Министерството за внатрешни работи (МВР).
„На 5.3.2024 околу 22 часот на подрачје на Карпош, пред зградата во кој времено престојува Ф.П. (29), од слобода бил лишен Д.П. (25), при што кај него биле пронајдени пари за кои постои сомнение дека потекнуваат од кривично дело“,
се наведува во полициското соопштение.
Подоцна, додаваат од МВР, при претрес во станот кој го користи Ф.П., извршен со судска наредба тој бил затекнат како со Д.Д. (32) пакуваат марихуана.
Притоа од МВР велат дека биле пронајдени 78 пакувања со марихуана, ќеса со марихуана, бела прашеста материја, дигитална вага, пари и други предмети со остатоци од наркотична дрога.
Трите лица биле задржани во полициска станица и како што велат од Министерството по целосно расчистување и документирање на случајот против нив ќе биде поднесена соодветна пријава.
Во акцијата биле вклучени полициски службеници од Одделот за криминалистичка полиција – Сектор за недозволена трговија со дрога, оружје и опасни материи и од СВР Скопје – Единица за недозволена трговија.