Лобиравме на повеќе нивоа, дипломатски или политички, да обезбедиме поддршка во гласовите и успеавме во тоа, дадено е правно толкување дека нема никакви пречки и дека тоа е изгубена битка за Србија, вели косовскиот заменик-министер за надворешни работи
Заменик-министерот за надворешни работи на Косово, Крешник Ахмети, изјави дека има неколку нон-пејпери кои Србија ги испратила на адресата на Советот на Европа во Стразбур против барањето на Косово за членство во Советот, но, според него, „ја изгубила таа битка“.
Ахмети рече дека Косово обезбедило поддршка при гласањето, како и правно толкување дека Косово нема пречки во таа насока.
„Србија отсекогаш била активна во спротивставувањето на Република Косово, било на билатерално или на мултилатерално ниво, во случајот со Советот на Европа, се спротивстави еден ден пред да аплицираме. Вучиќ свика состанок на Советот за национална безбедност на 11 мај минатата година пред Косово да поднесе барање за членство во Советот на Европа“,
вели Ахмети во интервју за приштинската агенција „Косовапрес“.
Тој додава дека може со целосно уверување да каже Србија ја загуби битката во Советот на Европа, а факт е дека правното мислење покажува дека Косово може да стане членка на Советот на Европа и дека има поддршка за тоа.
„Лобиравме на повеќе нивоа, дипломатски или политички, да обезбедиме поддршка во гласовите и успеавме во тоа, дадено е правно толкување дека нема никакви пречки и дека тоа е изгубена битка за Србија“,
рече Ахмети.
Заменик-министерот за надворешни работи на Косово рече и дека се надева на конструктивен пристап на Србија, но и на ЕУ во бриселскиот дијалог.
„Се надеваме дека ќе имаме поконструктивен пристап од Белград во дијалогот, но и поинаков пристап од Европската унија и другите западни земји, каде што не се игра на картата на неутралност во ситуации каде што е јасно кој е виновен, како што имавме на крајот на минатата година со напади врз новинари, со напади со огнено оружје врз косовските полицајци, со напади врз патроли на ЕУЛЕКС, со напади на КФОР. Работите треба да се нарекуваат со нивното вистинско име“,
рече тој.
Ахмети рече дека Србија не ја прекинала таканаречената кампања за повлекување на признавањето на Косово, но дека не постигнала никакви резултати.