Министрите за надворешни работи на Полска, Летонија, Литванија и заменик-министерот за европски прашања на Естонија, во својство на претставници на групата земји членки на ЕУ „Пријателите на проширувањето“, ја истакнаа поддршката за нашата земја за евроинтеграциите и дека ги ценат напорите што ги преземаат властите во спроведувањето на реформите.
„Обезбедувањето на членството во овие институции, ЕУ и НАТО, е особено важно затоа нашите четири земји се подготвени да го споделат своето искуство во процесот на преговори со ЕУ, но и за тоа како да се справите со безбедносните ризици кои произлегуваат од други надворешни актери. Има една етичка димензија на членството на земјите од регионот во ЕУ. Сметаме дека ЕУ им должи на овие земји одлука да ги прими во ЕУ, тоа е долг кон општеството, кон граѓаните, но тука е и безбедносната димензија и има и други актери надвор од ЕУ кои се активни во регионот, па така одлука за почеток на преговори ќе го спречи негативното влијание“,
рече министерот за надворешни работи на Полска, Јацек Чапутович, на заедничката прес-конференција по средбата со министерот Никола Димитров.
„Доаѓаат два дена по објавувањето на ажурираниот краток или, како што ние го нарекуваме мини-извештај на Комисијата. Европската комисија кажа дека ние испорачавме, дека не само што продолживме туку и ги зголемивме реформските напори и испорачавме опипливи и одржливи реформски резултати. Претходно, Комисијата предложи нова методологија за тоа како ќе се спроведува процесот на пристапување. И мислам дека овие два столба се одлична основа конечно да има испорака и од страна на ЕУ, една јасна, недвосмислена, опиплива, одржлива одлука за пристапни преговори“,
рече Димитров.
Министрите за надворешни работи од вчера се во посета на земјава, во својство на претставници на групата земји членки на ЕУ „Пријателите на проширувањето“, и синоќа имаа средба со претседателот на државата Стево Пендаровски.