Превозниците ќе го одржат протестот еден ден пред состанокот на Работната група во Брисел, од чиј исход, како што велат, ќе зависи дали кон средината на септември ќе почнат со протести и блокади на граничните премини
Прашан за коментар за најавените протести на транспортерите, вицепремиерот и министер за транспорт, Александар Николоски, денеска за медиумите изјави дека како Влада имаат целосно разбирање за проблемот на превозниците и се обидуваат да го решат во рамките на нејзините можности – преку билатерални договори со земјите од Шенген-зоната
Професионалните возачи од земјава на 31 август ќе одржат протест пред седиштето на Делегацијата на Европската Унија во Скопје, поради проблемот што го имаат со престојот во земјите од Шенген-зоната, која настана по воведувањето на системот за влез и излез – ЕЕС (Entry/Exit System) во Европската Унија.
Ова денеска го соопшти Асоцијатацијата „Макам-транс“, од каде што наведуваат дека одлуката за протестот, кој ќе трае два часа, била донесена во петокот, минатата недела, на состанок на превозниците, на кој се разговарало за проблемот што го имаат веќе неколку месеци.
Најавено е дека пред седиштето на Делегацијата на ЕУ ќе присуствуваат превозниците ќе дојдат со најмалку 20 возила, а ќе бидат присутни и голем број лица од сите градови во државата – сопственици, возачи и други вработени во превозни компании.
Вакви протести, како што информираат од „Макам транс“, покрај во земјава, истиот ден ќе се одржат и во Србија, Босна и Херцеговина (БиХ) во временскиот период од 12 до 14 часот.
Превозниците ќе го одржат протестот еден ден пред состанокот на Работната група во Брисел.
„Доколку на состанокот не се донесе преодно решение за престој на возачите во Шенген-зоната, предложено е да се одржи протест на граничните премини на секоја држава поодделно со почеток на 14.09.2026 година“,
се вели во соопштението на Асоцијацијата.
За овој вид протест, како што додаваат оттаму, потребна е согласност од превозниците на секоја држава, но и одобрение од надлежните органи, бидејќи се планира тој да биде идентичен со оној што превозниците го одржаа во јануари годинава, и може да трае подолго од 10 дена.
„Во оваа фаза асоцијациите од четирите држави собираат согласност од превозниците за организација на протестот како предупредување на Европска Унија, која во изминатите седум месеци не покажа добра волја за надминување на проблемот иако во визната стратегија се признаа возачите како професионалци кои вршат дејност“,
се наведува во соопштението.
Според „Макам-транс“, ќе се бара согласност од надлежните органи за дефинирање на стоките кои ќе се пропуштаат, а се од интерес на државата и целокупното население, односно нафта и нафтени деривати, јаглен, потребни орудија и препарати за општините и јавните претпријатија, муниција и други производи.
„За оваа цел е пратена анкета како би се утврдила согласноста од поголем број на превозници (70%) во државата или одбивање на предложениот протест доколку генерално нема согласност од превозниците“,
се вели во соопштението.
Прашан за коментар за најавените протести на транспортерите, вицепремиерот и министер за транспорт Александар Николоски денеска за медиумите изјави дека како влада имаат целосно разбирање за проблемот на превозниците и се обидуваат да го решат во рамките на нејзините можности.
Како што наведе Николоски, станува збор за правила кои ги уредува Шенген-зоната и она што тие како извршна власт во земјава можат да го направат и го прават е да помогнат преку потпишување билатерални договори со земјите од Шенген.
Вицепремиерот и министер за транспорт рече оти тоа се прави и дека веќе се постигнати договори со неколку земји, а во следниот период интензивно ќе се работи и на договори со други држави од Шенген-зоната.
Како што прецизира тој, договори веќе има со Швајцарија, Хрватска и Романија, а во септември и октомври се најавенби средби со австриската и словенечката влада за постигнување вакви билатерални договори.
„Гледаме генерално да ги покриеме рутите каде што македонските транспортери најчесто одат. Со Швајцарија веќе има одговор, со Хрватска има договор, со Романија има договор, како што кажав, следни за разговори се Австрија и Словенија и исто така работиме со Германија, така што на тој начин ги покриваме земјите каде што има најголема фреквенција и тоа е она што ние можеме да го направиме и го правиме во овој период“,
изјави Николоски.
Николоски и во јули изјави дека проблемот со професионалните возачи земјава го решава самостојно преку билатерални разговори со држави од Европската Унија, а не заедно со другите земји до Западен Балкан.
Инаку, здруженијата на превозници од Западен Балкан, на регионалната средба што кон средината не месецов се одржа во Скопје, рекоа дека ќе го чекаат закажаниот состанок на повисоко ниво со претставници на Европската комисија во Брисел од чиј исход ќе зависи дали ќе преминат кон протести.
Македонските, како и професионалните возачи на камиони од Србија, Црна Гора и Босна и Херцеговина, од крајот на минатата година се соочија со проблем откако почна воведувањето на системот за влез и за излез од Европската Унија (ЕЕС), според кој превозниците од Западен Балкан се регистрираат како туристи и можат да останат во земјите од ЕУ најмногу 90 дена, во период од 180 дена.