Како дел од Берлинскиот процес, на состанокот на министрите за внатрешни работи, постигнат е договорот за ефикасна заштита на границите со поддршка на европската агенција Фронтекс и за процедури за враќање на бегалците кои немаат правна основа за престој во ЕУ во нивните матични земји
Претставници од Западен Балкан и на Европската Унија синоќа во Берлин договорија мерки за спречување на илегалната миграција на „балканската рута“, информира германското Министерство за внатрешни работи.
Од договорените мерки најважни се усогласувањето на визната политика на западнобалканската шесторка со стандардите на ЕУ и сузбивањето на шверц на луѓе.
Како дел од Берлинскиот процес, на состанокот на министрите за внатрешни работи, постигнат е договорот за ефикасна заштита на границите со поддршка на европската агенција Фронтекс и за процедури за враќање на бегалците кои немаат правна основа за престој во ЕУ во нивните матични земји.
Министрите и официјалните лица се собраа во Берлин на покана на германската министерка за внатрешни работи, Ненси Фесер, за да разговараат за сузбивањето на илегалната миграција преку балканската рута и борбата против организираниот криминал.
„Европа има заедничка одговорност да го запре нелегалниот влез за да можеме да продолжиме да им помагаме на луѓето на кои итно им е потребна нашата поддршка. Сакаме да ги заштитиме луѓето кои доаѓаат кај нас поради војни и политички прогон. Остануваме доследни на нашата хуманитарна одговорност“,
рече Фесер и посочи дека европските партнери се решени да ја спречат илегалната миграција.
Заедно со договорот за миграција, Фесер додаде дека е постигнат договор сите европски партнери да сакаат дополнително да ја интензивираат соработката со земјите од Западен Балкан во борбата против корупцијата и организираниот криминал.
„Тоа ќе ја подобри безбедносната ситуација не само таму, туку и во ЕУ и пошироко“,
рече Фесер.
На средбата во Берлин беа поканети министри за внатрешни работи или други релевантни претставници на Австрија, Бугарија, Франција, Грција, Хрватска, Италија, Полска, Словенија, Чешка и Велика Британија, како и претставници на Западен Балкан – Албанија, Босна и Херцеговина, Црна Гора, Косово, Северна Македонија и Србија.
Берлинскиот процес е формат на годишни состаноци што германската влада, во времето на канцеларката Ангела Меркел, ги иницираше во 2014 година кога во Берлин се одржа Конференцијата за Западен Балкан. Целта на процесот е да се забрза соработката со шесте земји од Западен Балкан и интеграцијата на тој регион во ЕУ.
Иницијативата главно се фокусира на решавање на билатералните и внатрешните проблеми во регионот и подобрување на економската соработка, која би била основа за одржлив развој на регионот.
Како дел од Берлинскиот процес, секоја година се одржуваат самит и серија последователни состаноци.
Годинава, покрај состанокот на министрите за внатрешни работи на 20 октомври, предвиден е и состанок на шефовите на дипломатиите на земјите учеснички, а на 24 октомври е закажана средбата на министрите за енергетика.
Самитот на шефовите на држави или влади на Берлинскиот процес ќе се одржи на 3 ноември во Берлин.