Додека на домашен план се претставуваат како големи патриоти, на првата средба во Софија гордо позираа пред бугарското, но не и пред македонското знаме, а ниту на средбата на Давкова со Радев, ниту на средбите на министрите на Мицкоски со колегите министри од Бугарија немаше државно знаме, напиша лидерот на опозициската СДСМ, Венко Филипче
Претседателот на СДСМ, Венко Филипче, остро го осуди отсуството на државното знаме на земјава на вчерашната средба во Софија на претседателката Сиљановска-Давкова и бугарскиот претседател Румен Радев.
На социјалните мрежи, Филипче напиша дека при вчерашната посета на Бугарија од страна на претседателката Гордана Сиљановска-Давкова била погазена и понижена македонската држава и македонските граѓани со тоа што по првпат во историјата на земјава, македонски претседател остварил средба со претседател на друга држава без притоа да бидат истакнати државните обележја на Македонија.
„Да биде скандалот уште поголем, на средбата присуствуваше и министерот за надворешни работи и надворешна трговија, Тимчо Муцунски, кој беше само нем сведок на недоличниот и понижувачки чин. Очигледно е дека ниту еден претставник на македонската делегација не реагирал на ова деградирачко однесување“,
вели Филипче.
Претседателот на СДСМ вели дека скандалот се случува токму во Бугарија – земја која е омилена тема за ВМРО-ДПМНЕ да печали политички поени со популистички изјави и оти додека дома владејачката партија се претставува како патриотска, во Софија гордо позираат пред бугарското, но не и пред македонското знаме.
„Остро го осудувам ова понижување на државата и државните симболи. Покрај понижувањето, Давкова од Софија не се врати со ниедна конкретна порака или договор, додека бугарската страна јасно порача дека не отстапува од позициите.Не слушнавме нуту дали и како Давкова побарала унапредување на преговорите, промена на Преговарачката рамка и сè што ветуваат. Со еден збор, дипломатска катастрофа на ВМРО-ДПМНЕ и Давкова“,
кажа Филипче.
Претходно денеска, портпаролката на СДСМ, Богданка Кузеска, изјави дека македонската држава доживеа невидено понижување и срам на меѓународната политичка сцена поради тоа што делегацијата на чело со Гордана Сиљановска-Давкова и придружните министри вчера во Софија доживеаа дипломатски дебакл, оти беа пречекани како претставници на некои локални бугарски клубови или општински институции, а не како меѓународни високи претставници на држава членка на НАТО и важен партнер на Бугарија.