Владата и натаму не кажува како е ангажирана фирмата за која, според присутните возила, беше очигледно дека го организирала настанот што се одржа во вторникот на патарината кај Тетово, со кој беше најавена изградба на автопат од Kоридорот 8. Премиерот Димитар Ковачевски, сведувајќи го прашањето на тоа кој ја монтирал бината, вели дека деновите пред одржувањето на свеченоста не бил во земјава и не учествувал во монтирањето
Премиерот ги упати новинарите за ова да го прашаат вицепремиерот Артан Груби, велејќи дека тој е „претседател на управувачкиот комитет за Kоридорот 8“, иако во специјалниот закон што Собранието го усвои во јули 2021 г. јасно пишува дека мандатот на Комитетот завршува со склучување на договор за градење, што веќе се случи со „Бехтел и Енка“
Премиерот Димитар Ковачевски вели дека пред свеченоста за почеток на изградбата на автопат од Kоридорот 8 бил во Србија, Италија и во Словенија и затоа не бил дел од, како што рече, монтажа на бина на автопатот Тетово – Гостивар.
На новинарско прашање дали може, конечно, да се знае колку чинела церемонијата на наплатната станица, колку пари ѝ се исплатени на компанијата „Арбериа дизајн“, дали имало повик или зделката била договорена во четири очи, Ковачевски не одговори, туку раскажа што правел во деновите пред настанот.
„Во делот на подготовката на пуштање на работите на Kоридорот 8, вие бевте информирани дека бев прво во официјална посета на Србија, а потоа бев заедно со претседателот на Србија и премиерот на Албанија на меѓународниот саем за вино ‘Винитали’, каде заедно трите држави се претставивме. Потоа, бев во официјална посета на Словенија, така што поради службени обврски не бев во ситуација да бидам дел од монтажа на бина на автопатската делница Тетово – Гостивар“,
рече Ковачевски.
Тој ги упати новинарите за ова да го прашаат вицепремиерот Артан Груби.
„Сите информации кои се однесуваат на монтажата на бината и тоа кој ја монтирал, ќе можете да ги добиете од кабинетот на вицепремиерот Артан Груби, кој е претседател на управувачкиот комитет за Kоридорот 8“,
додаде тој.
Но, во специјалниот закон што Собранието го усвои во јули 2021 г. јасно пишува дека мандатот на Комитетот завршува со склучување на договор за градење, што веќе се случи со „Бехтел и Енка“ на 8 март годинава. Тоа значи дека Груби речиси еден месец не е претседател на Комитетот, за што премиерот, според одговорот, не е свесен.
Со ваквиот одговор, Владата го продолжи молкот за тоа кој стои зад организацијата на настанот во вторникот, со кој се одбележа почеток на изградба на автопат од Kоридорот 8.
„360 степени“ два дена по ред официјално праќаше прашања до владината прес-служба:
– Која компанија е приредувач на свеченост за поставување камен-темелник за изградба на автопат Тетово – Гостивар?
– Кој државен орган е носител на јавната набавка, кога е распишана таа, кога е склучен договорот, за кои услуги и колку е неговата вредност?
На настанот на патарината кај Тетово имаше бина која симболизираше автопат, видеоѕид, музика и многу обезбедување.
Од возилата паркирани околу бината беше очигледно дека организацијата ѝ е доверена на „Арбериа дизајн“. Оваа компанија лани во август ја организира прославата за годишнината од Рамковниот договор за 80 илјади евра. Јавната набавка ја спроведе Министерството за политички систем и односи меѓу заедниците, со кое раководи Артан Груби од ДУИ.
Компанијата лани ја организира и прославата за Денот на албанската азбука за речиси 60 илјади евра и е еден од најчестите добавувачи на Министерството за образование, пред сè, во печатењето книги и друг училиштен материјал, бизнис вреден повеќе милиони евра.
Но, овој пат, иако присутна на терен, „Арбериа дизајн“ ја нема на Електронскиот систем за јавни набавки како добитник на тендер за организација на настанот, па останува нејасно како и кој ќе ѝ плати за услугата?
Инаку, Владата вчера, како што соопшти, поради важноста за реализација на започнатите проекти за изградба на патните правци Скопје – Блаце, Кичево – Букојчани, железницата Кичево – Лин, заедничките гранични контроли со Република Албанија и Република Косово и реализацијата на Коридорот 8, го назначила Артан Груби „за координатор за следење на работите и за координација на сите активности, со цел нивна навремена реализација“.
На прашањето зошто имало потреба Груби да биде поставен за координатор со вакви задачи, со оглед на тоа што постојат релевантни институции како Министерството за транспорт и врски и Јавното претпријатие за државни патишта, премиерот Ковачевски рече дека, како и во други големи инфраструктурни проекти, покрај обврските што ги имаат институциите, се јавува потреба од мислења и ефикасна работа и на други институции кои се во надлежност на Владата. Па, за ефикасно координирање на тие активности се назначува еден од вицепремиерите.
„Не се работи за никаква дополнителна одговорност, не се работи за никаква надлежност, туку се работи за координација исто како што сите вицепремиери имаат координативна улога во други проекти“,
рече премиерот.