Според Ковачевски, Пенов е потврда за скромност, чесност и работливост. За ВМРО-ДПМНЕ, пак, предлогот поранешниот градоначалник на Скопје да биде нов министер за локална самоуправа значи продолжување на транзициската матрица
Предлогот поранешниот градоначалник на Град Скопје, Ристо Пенов, да биде нов министер за локална самоуправа на местото на Горан Милевски, стигна на дневен ред во Собранието. Пред пратениците го претстави премиерот Димитар Ковачевски велејќи дека станува збор за одличен предлог кој ќе ја зајакне Владата и ќе ја зголеми ефикасноста и успешноста во нејзиното работење.
Премиерот, како што рече, е убеден дека Пенов ќе направи многу повеќе во стратегиските политики и на локално и на централно ниво.
„Станува збор за значаен ресор за нашите општини кои за една година гледаме дека се наоѓаат во проблеми кои ги водат неспособни градоначалници. Предлагам вистински човек, на вистинско место, во вистинско време. Господинот Ристо Пенов е синоним за успешен градоначалник, за макотрпна работа, за резултати и успех. Тој е потврда за скромност, чесност и работливост. Тој е човек кој интегрира, соработува и има визија. За него најдобро говорат капиталните проекти во Скопје, улиците, мостовите, инфраструктурата, километрите нови патишта, тротоари, нови плоштади, поддршка на локалните бизниси и на културата“,
рече Ковачевски.
Пратениците од ВМРО-ДПМНЕ, пак, во своите говори ја критикуваа целата Влада повеќепати нагласувајќи дека се потребни предвремени избори.
„Што е тоа што може Пенов да го подобри во Владата? Државата се соочува со криза на енергетски, економски, социјален план, имаме тотално потфрлање и корумпираност во безбедносниот сектор, а вие Ковачевски овде ни предлагате смена на министер за локална самоуправа, демек сите ресори се добри, но во моментов најважен ресор што треба да се подобри е ресорот за локална самоуправа“,
рече Драган Ковачки од ВМРО-ДПМНЕ.
Неговиот колега Бојан Стојаноски, пак, предлогот Пенов да биде министер за локална самоуправа го нарече продолжување на транзициската матрица и ставање на функција на истрошени кадри.
„Пенов првпат стана градоначалник во 1996 година кога имало најмногу претпријатија испратени под стечај и над 200 000 работници оставени на улиците“,
критикуваше Стојаноски.
Функционерите од периодот кога Пенов беше градоначалник, според пратеникот од ВМРО-ДПМНЕ, мислеле само на сопственото богатење, а не на граѓаните. Како владеел тој во периодот кога беше градоначалник и како се справувал со предизвиците, Стојановски посочи дека говори приватизацијата на три субјекти: ГТЦ, Скопски пазар и Градски аптеки.
Пратениците од СДСМ, пак, застанаа во одбрана на Пенов велејќи дека скопјани воопшто немаат лошо искуство од времето кога тој беше градоначалник и дека зад себе оставил проекти кои се за доброто на граѓаните.
Собраниската седница на која на дневен ред една од точките е Пенов да биде министер за локална самоуправа започна минатата недела, но оваа точка беше прескокната со оглед дека премиерот Ковачевски, кој требаше да го образложи предлогот, беше на службен пат.
Премиерот го предложи Пенов, откако претходно поранешниот скопски градоначалник беше предложен од Либерално демократската партија (ЛДП) која при распределбата на „владиниот колач“ го доби ресорот локална самоуправа.