Екипите на Електродистрибуција ќе започнат со реализација на проектот за реконструкција на мрежата во Слупчане, соопштија од ЕВН, додавајќи дека е постигнат договор со жителите на Слупчане.
„Постигнат е договор со мештаните на Слупчане, а гаранции се дадени од локалната власт и од страна на сите политички партии“,
информираа од ЕВН.
Наредната недела во организација на министерот за економија и градоначалникот на Липково ќе се одржи состанок во општина Липково на кој ќе се договорат сите детали за организацијата и реализација на проектот и со работа на терен ќе се започне од 9-ти август.
Министерот за економија Крешник Бектеши вечерва во гостувањето на Дневникот на ТВ Сител потврди дека ЕВН и жителите на Слупчане имаат некаков предлог-договор.
„Колку што сум информиран од страна на градоначалникот и од страна на наши претставници во Слупчане, проблемот ќе биде решен“,
изјави Бектеши за ТВ Сител.
Министерот е на став дека сметките за струја мора да се плаќаат, а загубите во електродистрибутивната мрежа да се намалат.
„Не може ако одредено правно или физичко лице прави проблем, да страдаат сите. Мора да се направи мрежа согласно европските стандарди каде што во случај физичко или правно лице да направи злоупотреби, за него да се исклучи снабдувањето со електрична енергија, а не и за неговиот сосед или целиот град“,
рече Бектеши.