Претседателката на Советот на јавните обвинители избегна да одговори на новинарските прашања околу делот на постапката што е во надлежност на ова тело и што точно ќе оценуваат кај државниот јавен обвинител
Предлогот за разрешување на државниот јавен обвинител Љупчо Коцевски што го подготви Министерството за правда во вторникот помина на владина седница, а во него се вели дека државниот јавен обвинител постапувал во предмети во кои согласно законските одредби постоеле околности кои предизвикуваат сомневање во неговата непристрасност, како и судир на интереси, а за кои тој требало да знае и требало да се изземе
Предлогот за разрешување на државниот јавен обвинител, Љупчо Коцевски сè уште не стасал во Советот на јавните обвинители, кој треба да даде мислење по него пред постапката да се пресели во Собранието.
Ова по завршувањето на денешната седница го соопшти претседателката на Советот, Душица Димитриеска, но избегна да одговори конкретно на прашањата на новинарите околу делот на постапката што е во надлежност на ова тело и што точно ќе оценуваат кај јавниот обвинител.
Димитриеска се држеше до ставот дека треба првин да го добијат предлогот, да видат што има во него, па потоа ќе се произнесат.
Еве што прашаа новинарите и какви одговори добија од претседателката на Советот за една од темите која е во фокусот на јавноста.
„Новинар: За да биде појасно за јавноста, бидејќи некогаш во отсуство на факти се лицитира дури и со кривични пријави, одговорност, разрешување овде (во Советот на јавни обвинители). Може ли да ни ја објасните постапката и што точно вие ќе оценувате кај јавниот обвинител. Нам ни е јасно како медиуми, но малку повеќе за јавноста?
Димитриеска: И минатиот пат кажав, првин да го добиеме предлогот, да ги видиме наводите коишто се наведени во истиот, па потоа ќе се произнесеме.
Новинар: Меѓутоа кои се надлежностите (на Советот на јавните обвинители)?
Димитриеска: Не можам однапред да ви кажам и да ви дадам одговор на тоа прашање.
Новинар: Кривично секако нема да го гоните, дисциплинска постапка, која е законската процедура:?
Димитриеска: Значи онака како што е пропишано во Законот. Ќе постапиме согласно законските надлежности на Советот. Пред да стигне предлогот, не можам да ви дадам одговор на тоа прашање.
Предлогот за разрешување на државниот јавен обвинител Љупчо Коцевски што го подготви Министерството за правда во вторникот помина на владина седница, а во него се вели дека државниот јавен обвинител постапувал во предмети во кои согласно законските одредби постоеле околности кои предизвикуваат сомневање во неговата непристрасност, како и судир на интереси, а за кои тој требало да знае и требало да се изземе.
За предлогот на Владата сега свое мислење се очекува да даде Советот на јавни обвинители, кое има рок од 15 дена да го направи тоа.
Во Законот за јавно обвинителство се наведува дека ако Советот на јавни обвинители на Република Северна Македонија од оправдани причини во определениот рок не достави мислење до Владата, рокот се продолжува за уште 15 дена.
„Ако и во овој рок Советот на јавни обвинители на Република Северна Македонија не достави мислење, се смета дека не го поддржува предлогот на Владата на Република Северна Македонија“, се вели во член 88 од Законот за јавно обвинителство.
Инаку, според Законот за јавно обвинителство, државниот јавен обвинител може да биде разрешен по две основи – ако е член на политичка партија и ако сторил тешка дисциплинска повреда.
Под тешка дисциплинска повреда, според членот 91 од овој Закон, а која се однесува и на јавниот обвинител на Република Северна Македонија се смета, ако сторил потешка повреда на јавниот ред и мир и други посериозни форми на недолично однесување со која се нарушува угледот на јавното обвинителство и неговиот углед. Потоа ако одбие да поднесе изјава за имотна состојба и интереси согласно со закон или ако податоците содржани во изјавата во голема мера се невистинити; очигледно прекршување на правилата за изземање во ситуации во кои јавниот обвинител знаел или требало да знае за постоење на некоја од основите за изземање предвидени со закон; потоа како со правосилна судска пресуда е осуден на пократка казна од шест месеци затвор или друга кривична санкција за кривично дело кое е директен резултат на постапување во вршење на јавнообвинителската функција, намерно или со свесна небрежност или ако неовластено издава класифицирани информации, односно изнесува информации и податоци за судски предмети со што се повредува обврската за заштита на тајноста на постапката утврдена со закон и кога јавноста е исклучена согласно со закон.
Под тешка дисциплинска повреда, исто така се смета и како намерно и неоправдано јавниот обвинител направи крупна професионална грешка, при што различното толкување на правото и фактите не може да претставува основ за утврдување на одговорност на јавниот обвинител.
Сепак, Законот не е до крај јасен дали Владата може да предложи разрешување на јавниот обвинител до Собранието и во случај Советот на јавни обвинители да даде негативно мислење по владина иницијатива за разрешување. При избор на државен јавен обвинител, Владата може да избере кого ќе предложи до Собранието само од оние кандидати пријавени на конкурсот за кои Советот на јавни обвинители дал позитивно мислење.
За разрешувањето на државниот јавен обвинител последниот збор ќе го имаат пратениците, од каде за негова смена е потребен 61 глас во Собранието. На оваа седница, според законот, државниот јавен обвинител може да присуствува и на неа да се произнесе по предлог на Владата за негово разрешување.
Државниот јавен обвинител Љупчо Коцевски, чие разрешување се бара минатата недела во изјава за медиумите рече дека од она што досега го слушнал во јавноста нема никаква тешка дисциплинска повреда врз основа на која може да биде разрешен.
Рече дека дека ќе се произнесе по предлогот за негово разрешување откако Владата ќе го достави до Советот на јавните обвинители, а во истата прилика тој изјави и дека доколку се утврди оти се исполнети условите за негово разрешување согласно Законот за јавни обвинители, во тој случај и самиот ќе се повлече, во спротивно, како што додаде, јавноста нека цени дали е разрешен законски или не.
Инаку, јавниот обвинител на Република Северна Македонија присуствуваше и на денешната седница на Советот на јавните обвинители, чиј член е по функција, но ги избегна новинарите по нејзиното завршување.
Премиерот Христијан Мицкоски и вчера од собраниската говорница го повтори ставот дека на државниот јавен обвинител Љупчо Коцевски му била дадена шанса, но она што од него се видело изминатиот период не било ништо друго освен пресметки со неистомисленици во Обвинителството и последен браник за одговорноста на претходната власт.
„Дадовме шанса што може да направат, дали може да излезат од таа политичка матрица во која се наоѓаат поединци, не сите. Не влеговме како другите влади од прв ден да се пресметуваме со обвинителот и да правиме маратонски седници и да менуваме закони. Рековме да оставиме простор, но освен внатрешна пресметка со неистомисленици во рамките на Обвинителството, која се случи како резултат на процеси во позадина, како исплатените дневници за поранешните специјални обвинители, друго ние не видовме. Друго беа изговори“, рече Мицкоски.