Освен пратеникот од ВМРО-ДПМНЕ, Миле Лефков, претходно денеска и од Владата упатија повик за извинување од опозицискиот СДСМ откако Антикорупциската комисија утврди дека синот на премиерот Христијан Мицкоски, Јован Мицкоски, не бил дел од владината делегација и оти сам ги покрил трошоците за патот и сместувањето во САД
Пред фактите и боговите молчат и на лагата ѝ се кратки нозете – се две реченици кои поентираат во еден ваков случај, велат од владејачката ВМРО-ДПМНЕ по денешната одлука на Антикорупциската комисија со која го затвори предметот за патувањето на синот на премиерот, Јован Мицкоски, во САД, откако било утврдено дека тој не бил дел од владината делегација и сам си ги платил патот и сместувањето во Вашингтон.
„Лагите и бедната и ниска кампања на СДСМ и нивните мегафони конечно го доби заслужениот одговор и доказ дека има причина за тоа што се наоѓаат таму каде што се наоѓаат. Но, не можеме да кажеме дека целосно нè радува што вистината, иако со задоцнување, сепак, излезе на виделина. Впрочем, тоа нема да ги надомести нервозите и стресовите кои забеганоста на СДС ги произведе врз дете кое е недолжно, само во обид за добивање ситни поени, за теми во недостаток на суштински теми“,
изјави на денешната прес-конференција Миле Лефков, пратеник и член на Извршниот комитет на ВМРО-ДПМНЕ.
Оваа мала, но значајна победа на вистината над лагите на СДСМ, додаде Лефков, е доказ дека во Македонија може многу подобро од нив, а отчетноста на премиерот е пример како треба да се однесува еден политичар.
„Да им кажеме засрамете се и извинете се. Знаеме дека нема да го сторат тоа затоа што тоа е тој ментален склоп на тие луѓе во врвот на таа партија. Ние ќе сме најсреќни ако СДС се реформира и ја промени матрицата на измамништво и лажење“,
додаде пратеникот од ВМРО-ДПМНЕ.
Повик за извинување од опозицискиот СДСМ претходно денеска упати и новоименуваната владина портпаролка Марија Митева, која ја оквалификува како очекувана и разумна одлуката на ДКСК.
„Јасно се гледа од каде доаѓаат тие шпекулации и очекуваме дека во најмала рака треба да се поднесе извинување за сите шпекулации“,
рече Митева.
Изјавите и на пратеникот Лефков и на владината портпаролка Митева следуваат по денешната одлука на Државната комисија за спречување на корупцијата (ДКСК) која одлучи да го затвори предметот за патувањето на синот на премиерот Христијан Мицкоски, Јован Мицкоски, во САД, откако утврди дека тој не бил дел од владината делегација и оти сам ги покрил трошоците за патот и сместувањето.