Пратениците во Собранието денеска треба да се соберат на нова седница, 13-та по ред, на чиј дневен ред е предлогот за именување на замениците на министри во Владата.
Почетокот на пленарната седница е закажан за 11 часот.
Списокот со кандидати од Владата го објавија во петокот, и од него може да се види дека дел од заменик-министрите што беа поекспонирани за време на мандатот на претходната влада сега ги нема меѓу кандидатите чии имиња и биографии беа испратени во Собранието. Меѓу нив се Јани Макрадули, Кирил Колемишевски, Андреј Жерновски, Оливер Ристовски… сите од СДСМ се меѓу оние што веќе нема да бидат дел од втората постава на власта.
Според списокот со кандидати, за заменик-министер за одбрана е предложен Башким Хасани, во Министерството за внатрешни работи Назим Буши, а во ресорот правда предлогот за заменик-министер е Агим Нухиу.
Илхан Рахман е предложен за заменик на министерот кој раководи со Министерството за политички систем и односи меѓу заедниците, а Фатмире Исаки за заменик-министер за надворешни работи.
Во Министерството за финансии заменик на министерот Фатмир Бесими треба да му биде Димитар Ковачевски, а во Министерството за економија предложен е Зоран Маневски. Во ресорот земјоделство за заменик е предложен Трајан Димковски, кој претходно ја извршуваше министерската функција во истото министерство.
Докторот Илир Хасани е предлогот за заменик-министер во Министерството за здравство. Арафат Шабани е предложен во Министерството за образование и наука, Енвер Хусејин во Министерството за труд и социјална политика, Зоран Димитровски во Министерството за локална самоуправа и Седат Сулејмани во Министерството за култура.
За заменик-министер за информатичко општество и администрација е предложен Александар Бајдевски, во Министерството за транспорт и врски Беким Реџепи, а во Министерството за животна средина и просторно планирање, Христина Оџаклиеска.