Ако му се верува на заменик-координаторот на пратеничката група на владејачката ЦДУ-ЦСУ во Бундестагот, Јохан Вадефул, земјава во септември треба да очекува зелено светло од германскиот парламент, во октомври одлука за почеток на преговори потврдена од сите земји-членки на ЕУ, а во декември и отворање на првите поглавја. Но, овој став на партијата на Ангела Меркел – за одлагање на одлуката за наесен, беше жестоко нападнат во Бундестагот од пратеникот од опозициската партија на зелените и поранешен министер во германската влада, Јирген Тритин. Тој отиде и чекор понатаму и ја обвини партијата на Меркел дека не ја сака Северна Македонија во ЕУ, а валканата работа сака да ја остави на некој друг, па чека во Грција да победи Нова Демократија на Кирјакос Мицотакис, која потоа би ги блокирала евроинтеграциите на земјава. Го прашавме Тритин дали навистина го мисли ова или свесно претерал во дискусијата. Со Тритин, кој воопшто не е случаен во германската политика, бидејќи од 1998 до 2005 беше министер за животна средина и нуклеарна безбедност, во Берлин разговараше Владимир Мирчески.
Г-дине Тритин, дали навистина мислите дека владејачката ЦДУ-ЦСУ сака на долг рок да ја блокира С. Македонија, а „валканата работа“ да и ја остави на новата грчка влада на Мицотакис, или ова беше само ваше преувеличување?
Мислам дека постои вистинска опасност затоа што видовме дека компромисот за преименување во С. Македонија беше жестоко нападнат во Грција. Националистите ја напуштија владата, конзервативците се обидоа да ја урнат владата на Ципрас токму заради ова прашање. Моето мислење е дека ако Германија сега ја блокира одлуката за одредување датум за почеток на преговори на идниот Совет на ЕУ, конечно ќе има нова влада во Грција која ќе блокира се. Затоа, навистина се плашам дека процесот на пристапување што беше ветен на граѓаните на С. Македонија, ветувањето беше „ако направите компромис со Грција за прашањето за името“ ќе добиете прием во НАТО и потенцијален пристап до ЕУ, а токму тоа го сакаат граѓаните на С. Македонија. Тие сакаат да бидат дел од заедничка Европа, многу е едноставно.
Демохристијаните во Германија тврдат дека бил многу кус периодот од објавувањето на извештајот на Европската комисија до можноста Бундестагот да расправа за пакетот за проширување. Дали мислите дека има време за нов притисок за пакетот за проширување имајќи во предвид дека има сесија на германскиот парламент од 24 до 28 јуни?
Ќе беше многу лесно да се праша германскиот Бундестаг по објавувањето на извештајот на ЕК, зашто Бундестагот е во можност да решава за такви прашања во период од неколку недели. Извештајот не беше објавен вчера, тој беше објавен пред неколку недели и тој содржи препорака. Но, ова прашање не се покрена пред германскиот парламент. Владата дури и го блокираше парламентот за да почне расправа. Тоа значи дека владата е одговорна зошто парламентот излезе смешен.
Мислите ли дека вашата политичка група ќе може да го турка ова прашање?
Немаме мнозинство. Мнозинството за оваа процедура е исто како она за поддршка на владата. Ако демохристијаните и социјалдемократите не го иницираат ова прашање пред парламентот ние ќе немаме шанса за него да дебатираме. Не е дека немаме време, туку дека нашето време ни го украде владата.
Значи, велите дека за ова прашање има поделба во коалицијата меѓу ЦДУ и СПД?
Покомплицирано е. Има поделба внатре кај демохристијаните зашто поголемиот дел од луѓето кои ја креираат надворешната политика се „за“ отворање пристапни преговори. На тоа се противат дел од европските политичари, пред се првиот човек на Европскиот комитет на Бундестагот и членовите на внатрешнополитичката комисија кои се плашат од ваква одлука и имаат, повеќе или помалку, воздржаност која не е главно кон С. Македонија, туку кон паралелниот процес на пристапување на С. Македонија и Албанија. Тие на тоа се противат. Но, одговорност е на канцеларката да го надмине ова зашто ветувања беа дадени и тие беа многу јасни – ако го реформирате судството, се справувате со корупцијата, се движите во насока на европските стандарди, тогаш има шанса за пристапување кон ЕУ и тоа е тоа што не е фер – да ветите…. А С. Македонија сега испорачува, а вие да и кажете, не ми е грижа за нашите ветувања.
Зошто ЦДУ толку инсистира на заедничка одлука и за С. Македонија и Албанија кога холандскиот парламент усвои позиција со која јасно вели дека е против отворање пристапни преговори со Албанија. Оваа одлука нема да се промени до октомври?
Не разбирам… Мислам дека ако го интерпретирате на поконструктивен начин, тогаш може да се толкува како „сакаме да бидат заедно, а не да ја исфрлиме Албанија“, но се плашам дека причините поради кои мнозинството во холандскиот парламент е против Албанија се истите поради кои Германија ја блокира С. Македонија.