Пратеничката од СДСМ со ковид најави дека со скафандер доаѓа во Собрание, Апасиев се заканува со тужба за биолошки тероризам

Координаторот на пратеничката група на СДСМ Јован Митрески – ако постигнатиот договор на нивниот лидер Заев со Села и со Гаши за Законот за државјанство не придонесе за нормализирање на работата на Собранието, тогаш ќе бидат принудени, пратениците од мнозинството кои се болни од ковид да бидат донесени во салата и да учествуваат во работата со скафандери

Пратеничката од СДСМ Бисера Костадиновска Стојчевска пред половина час на Фејсбук објави фотографија облечена во скафандер, заедно со објава во кои стои дека оди во Собранието, со целосна заштитна ковид-19 опрема, за да учествува на денешната седница на која се законите за финансиска помош за граѓани и компании од петтиот пакет антикризни мерки.

Пратеничката е еден од тројцата претставници од редот на мнозинството кои се позитивни на коронавирус. Костадиновска Стојчевска вели дека се чувствува добро.

„Нема да дозволиме уцени! Мојата должност како пратеничка е постојана и благородна. И здрава и болна, имам обврска да направам сѐ граѓаните да ја добијат помошта која Владата ја обезбеди за нив. А, ВМРО-ДПМНЕ и опозицијата можат и понатаму да прават сѐ што намериле против народот – но џабе им е, денес ќе ја завршиме работата. Граѓаните ќе победат и уште еднаш ќе видат колкава РАЗЛИКА ИМА меѓу СДСМ и ВМРО-ДПМНЕ односно меѓу тоа да правиш СЀ ЗА народот и да правиш СЀ ПРОТИВ народот“,

напиша пратеничката.

Оваа можност, пратениците кои имаат ковид, во скафандери да се појават денеска на седница за да се обезбеди кворум, ја најви и координаторот на СДСМ Јован Митревски во изјава за „360 степени“.

Ако утре нема кворум, пратениците од власта кои имаат ковид со скафандери ќе дојдат во Собрание

Пратеникот од Левица пак, Димитар Апасиев на Фејбсук уште синоќа најави дека доколку ова се случи, ќе поднесе кривична пријава за, како што вели, биолошки тероризам.

„Ако власта се дрзне да донесе заразени пратеници од карантин на пленарна седница, ќе попие кривична пријава за БИОЛОШКИ ТЕРОРИЗАМ и некој ќе си го крка, фино-лепо, по падот на Режимот“,

напиша тој.

За во 14:15 часот е закажана 36. пленарна седница на чиј дневен ред се законите од петтиот пакет, а 15 минути претходно, во 14 часот, е закажана 32. седница.

Според најавата од координаторот на пратеничката група на ВМРО-ДПМНЕ Никола Мицевски, пратениците од оваа партија остануваат на ставот од минатата недела – ќе учестуваат на 36-та, но не и на претходната.

Но, она што може да направи напредок во оваа статус-кво ситуација е најавата што дојде вчера од претседателот на Алтернатива, Африм Гаши, кој во изјава за „360 степени“ вели дека имаат начелен договор со својот коалициски партнер, лидерот на Алијанса за Албанците, Зијадин Села, да присуствуваат на утрешната седница на Собранието и  доколку навистина има потреба и нема кворум, тогаш вели дека нивните пратеници ќе влезат во собраниската сала и ќе го обезбедат.

Гаши за 360°: Не разбираме што сака Талат Џафери, но ако немаат мнозинство, ние со Села ќе влеземе во салата и ќе гласаме за антикризните мерки