Шпанија доби коалициска влада, министрите дадоа свечена изјава и очекуваме следната недела да почне парламентарната процедура. Прашање е на недели, смета министерката за одбрана Радмила Шекеринска, за тоа кога може да се очекува да заврши ратификацијата на Протоколот за НАТО со што и формално се заокружува процесот за нашето членство на НАТО.
Посебно што се приближува и датумот за распуштање на нашето Собрание во прилог на изборите за 12 април, поради што тој временски простор станува се помал. Затоа најверојатно ќе биде активиран планот Б на Владата, а тоа е условена ратификација во Собранието.
„Ние не можеме да го диктираме парламентарниот календар на Шпанија, но сигурна сум, а тоа го добивме и како уверување од страна на Шпанија, дека прашањето ќе се разгледува како прашање на приоритет. Јас очекувам во следните неколку недели и нашето Собрание да ја гласа ратификацијата, а ќе почекаме до депонирање на нашиот ратификуван протокол и договор сè додека Шпанија не го ратификува нивниот дел од задачата“, вели Шекеринска за Радио Слободна Европа.