За гаснењето на пожарот, кој е на непристапен терен, од ЦУК велат дека е побарано да се интервенира со воздушна поддршка
Пожарот, што од вчера попладне е активен на Шар Планина над селото Вешала во Општина Тетово, каде што вчера гореа сува трева и папрат, утрово се проширил и зафатил и букова шума, информираат од Центарот за управување со кризи (ЦУК).
За гаснењето на пожарот, кој е на непристапен терен, од ЦУК велат дека е побарано да се интервенира со воздушна поддршка.
Утрово во 6:55 на терен веќе биле испратени 10 ренџери од Националниот парк „Шар Планина“ од Тетово, кои пожарот го гаснеле со грбни противпожарни прскалки, но побарана е помош и од други надлежни институции.
„Од терен е побарана итна воздушна поддршка заради неможноста пожарот да се стави под контрола. Од ЦУК е побарана воздушна поддршка од Дирекцијата за заштита и спасување и Министерството за внатрешни работи, а преку Регионалниот центар за управување со кризи од Тетово е побарано од тетовските пожарникари да пратат камион со вода која е потребна за ренџерите да интервенираат“,
велат од ЦУК.
За пожарот вчера информираа од ЦУК, од каде што рекоа дека биле испратени екипи за да интервенираат, но поради лошиот и непристапен терен и настапување на ноќта, ренџерите од Националниот парк „Шар Планина“ биле повлечени од терен.