Се планира највисокиот износ што може едно лице да го оствари, како право на поврат на дел од данокот на додадена вредност, да се зголеми на 2 100 денари по квартал за едно физичко лице
Повратот од мерката „Мој ДДВ“ од 1 јануари 2023 година ќе биде 2 100 денари. Ова е одлука која денеска е усвоена на владина седница.
„Владата на денешната седница го утврди текстот на Предлог-законот за изменување и дополнување на Законот за враќање на дел од данокот на додадена вредност на физичките лица, предложен од Министерството за финансии“,
се наведува во соопштението од Владата.
Со предложените измени, се додава во соопштението, се зголемува највисокиот дозволен износ којшто може да се врати на едно физичко лице за едно календарско тримесечје.
„Се планира највисокиот износ што може едно лице да го оствари, како право на поврат на дел од данокот на додадена вредност, да се зголеми на 2 100 денари по квартал за едно физичко лице. Сега овој износ по лице и по квартал е до 1 800 денари“,
додаваат од Владата.
Зголемувањето на повратот од „Мој ДДВ“ пред скоро два месеца го најави директорката на Управата за јавни приходи Саља Лукаревска. Таа тогаш рече дека за ова се обезбедени средства за што имале подадено рака од Министерството за финансии.