Денешната расправа на Комисијата за прашањата за изборите и именувањата беше 25. продолжение на седницата на која се расправаше за избор на кандидатот за уставен судија Љубомир Јовески, кој беше предложени од владејачкиот СДСМ за работа во Уставниот суд
Предлогот за кандидатот Љубомир Јовески – доскорешниот државен јавен обвинител кој во декември лани замина во пензија – да биде избран за судија во Уставниот суд е повлечен. Согласно тоа е исцрпен дневниот ред на 13. седница на собраниската Комисија за прашањата на изборите и именувањата, а расправата е завршена.
Денес СДСМ ја повлече кандидатурата на Љубомир Јовески за уставен судија, изјави пратеничката од ВМРО-ДПМНЕ, Дафина Стојановска, оценувајќи дека владејачката партија повеќе нема никаква корист од Јовески.
„Главниот политички егзекутор, слепиот послушник и заштитникот на криминалот на власта во изминатите шест години си ја заврши работата, а штета за тоа претрпе најмногу македонското судство. По две и пол години и 25 продолженија на матичната комисија во Собранието и по еклатантно кршење и газење на Деловникот, сега СДСМ глумејќи одговорна партија се откажа од Јовески. Тој повеќе не е им е потребен бидејќи задачата за којашто беше поставен си ја исполни, а со тоа криминалите на СДСМ и ДУИ шест години беа заштитени“,
изјави пратеничката Стојановска.
Прашана дали повлекувањето на кандидатурата на Јовески ВМРО-ДПМНЕ го смета за свој успех, со оглед на тоа дека пратениците од оваа партија преку филибастеринг сакаа да го спречат неговиот избор во Уставниот суд, Стојановска вели дека Јовески би бил избран за уставен судија уште во септември 2022 година доколку ВМРО-ДПМНЕ не го блокирала неговиот избор.
„Ова го сметаме исклучиво како наша победа, притоа имајќи ги предвид континуирани обвинувањата дека ВМРО-ДПМНЕ во ова Собрание единствено што прави е да блокира. Значи, во право сме биле што сме блокирале затоа што во спротивно мислам дека имаше една седница на 14 септември 2022 на којашто дотичната личност ќе беше веќе изгласана и ќе беше веќе судија во Уставниот суд. Значи, имало причина зошто сме блокирале и еве го резултатот. Знаете што сме блокирале, исклучиво штетни противуставни одлуки и еве го доказот од тоа“,
додава Стојановска.
Денешната расправа на Комисијата за прашањата за изборите и именувањата беше 25 продолжение на седницата на која се расправаше за избор на кандидатот за уставен судија Љубомир Јовески. Тој беше еден од кандидатите предложени од владејачкиот СДСМ за работа во Уставниот суд. Овој суд подолго време работи во некомплетен состав бидејќи постапката за избор на нови членови заглави во Собранието.