Костадин Костадинов од СДСМ, Тимчо Муцунски и Кирил Пецаков од ВМРО-ДПМНЕ, Билал Касами и Кастриот Реџепи од Беса… се дел од пратениците кои се кандидати за градоначалници. Меѓу кандидатите има и еден министер – Горан Милевски, претседателот на ЛДП, кој е кандидат за Битола
Повеќе пратеници од различни партии се кандидати за градоначалници во општините од кои потекнуваат, ама досега никој од нив не поднел оставка од пратеничката функција. Претседателот на парламентот Талат Џафери, одговарајќи на новинарско прашање на денешниот брифинг, потврди дека досега никој од пратениците што натпреваруваат на локалните избори не поднел оставка за, како што рече, да ѝ се посвети на кандидатурата.
Џафери вели дека тоа што дел од пратениците се кандидати за градоначалници е една од причините поради кои Собранието нема да заседава најмалку во овој дел од кампањата, пред првиот изборен круг. Дали паузата ќе продолжи и во двете седмици пред вториот круг, тој вели зависи од тоа каква ќе биде тогаш ситуацијата.
Спикерот посочува оти тоа што Собранието не заседава пред изборите не е законска обврска, туку дека станува збор за процена дека парламентот може да се злоупотреби за политички маркетинг во време на кампањата. Сепак, како што вели Џафери, доколку има барање за итна седница на конкретна тема и по предлог на најмалку 20 пратеници, тој нема да попречи да се одржи таква седница. Како пример во тој контекст ги посочи најавите од Државниот завод за статистика (ДЗС) за можно продолжување на пописот за неколку дена, за што би биле потребни измени на Законот за попис, доколку за тоа има консензус меѓу пратеничките групи.
Костадин Костадинов од СДСМ, Тимчо Муцунски и Кирил Пецаков од ВМРО-ДПМНЕ, Билал Касами и Кастриот Реџепи од Беса… се дел од пратениците кои се кандидати за градоначалници. Меѓу кандидатите има и еден министер – Горан Милевски, претседателот на ЛДП, кој е кандидат за Битола.
Во претходниот состав на Собранието имаше неколку примери на пратеници кои се повлекоа од функцијата за да се кандидираат за градоначалници во 2017 година. На пример, Касами и тогаш се кандидираше за градоначалник на Тетово, откако претходно се повлече од парламентот, така што по изборите остана и без пратеничкото место. Пред овие избори оставка поднесе директорот на Царината, Горан Сугаревски, за да се кандидира за градоначалник на Прилеп.