Успеавме до некаде да ја санираме штетата. Некаде сме на нешто повеќе од една четвртина од водните текови на каналот, кој исто така ги лади електраните и снабдува со вода. Полицијата води истраги, има рации и апсења, како и материјални докази и сите овие криминалци и терористи ќе се соочат со правдата и со законите, вели Курти
Полицијата извршила рација и има уапсени лица и материјални докази за нападот со експлозив врз водоводниот канал Ибар-Лепенец што се случи синоќа во селото Варага кај Зубин Поток. Косовскиот премиер Албин Курти кој денес го посети местото, порача дека штетата е до некаде санирана, а криминалците и терористите, како што рече, ќе се соочат со косовските закони.
„Успеавме до некаде да ја санираме штетата. Некаде сме на нешто повеќе од една четвртина од водните текови на каналот, кој исто така ги лади електраните и снабдува со вода. Полицијата води истраги, има рации и апсења, како и материјални докази и сите овие криминалци и терористи ќе се соочат со правдата и со законите на демократска Република Косово,“
изјави Курти.
Фото: Принт скрин
Косовските власти претходно ја обвинија Србија дека стои зад нападот со експлозив што предизвика прекин на водоснабдувањето во регионот. Според Курти, станува збор за терористички акт.
„Нападот го извршиле професионалци. Ние сме убедени дека доаѓа од бандите предводени од Србија. Доколку не се санира штетата, тогаш дел од Косово ризикува да остане без струја,“
рече Курти.
Србија го осуди нападот, а министерот за надворешни работи Марко Ѓуриќ обвини дека вперувањето прст во Белград без докази, отвора сомнежи за вмешаност на Приштина.
„Овој длабоко вознемирувачки чин на саботажа ги загрозува животите и егзистенцијата на безброј поединци во регионот. Ибар-Лепенац е критичен воден пат од суштинско значење за производството на електрична енергија, земјоделството, водата за пиење и целокупната благосостојба на заедниците на кои опслужува. Ваквите деструктивни дејства се неприфатливи и ја загрозуваат кревката стабилност што се стремиме да ја одржиме“
кажа Ѓуриќ.