За втората делница сумата на проектантската вредност е некаде над 190 милиони евра. Тоа, според Бочварски, е голема и сериозна инвестиција на мошне тежок терен и очекува дека во текот на наредната година веќе ќе има активности и на овој дел
Постојниот пат Скопје-Блаце ќе се рехабилитира, за што веќе има избрано изведувач на градежните работи, а во однос на втората делница веќе привршуваат проектните постапки и се очекува во наредниот период да се распише тендерската постапка. Ова го најави министерот за транспорт и врски Благој Бочварски при неговата денешна посета на Пробиштип.
„За оваа делница сумата на проектантската вредност е некаде над 190 милиони евра. Тоа е голема и сериозна инвестиција на мошне тежок терен и очекувам дека во текот на наредната година. Доколку биде успешна постапката за избор на изведувач, веќе ќе имаме активности и на втората делница, а ќе очекуваме и завршување на првата делница со што тие над 12 километри до обиколницата на Скопје ќе влезат во комплетна реорганизација на теренот. Веќе имаме избрано изведувач и за рехабилитација на постоечкиот пат Скопје – Блаце којшто е во една полоша состојба“,
вели министерот за транспорт и врски, Благој Бочварски.
Според него, целта е патната инфраструктура да се доведе до ниво какво што заслужуваат граѓаните.
„Чекорите што се изгубени во минатото денеска, и во најголемата криза, ги враќаме. И не само со овој патен правец, туку и со патниот правец на Коридорот 10-Д од Градско кон Дреново – Фариш, Фаришката Клисура, Плетвар и сите останати патни правци со цел да се подобри сликата на инфраструктурата“,
рече Бочварски.
Министерот додаде дека за втората делница од експресниот пат Штип-Кочани денеска е завршена постапката за експропријација која што одзела доста време.
„Овој експресен пат е со над 92 проценти прогрес на работите и нашите очекувања се дека во декември ќе можеме да го пуштиме во сообраќај под времен режим“,
изјави Бочварски.