Со косовскиот премиер, македонскиот претседател вели дека има исклучително добра соработка и дека двајцата имаат добро мислење еден за друг. Во неговите јавни настапи во Скопје и во Тетово, вели Пендаровски во вечерашното гостување на ТВ Сител, не слушнал ништо навредливо за државата и македонскиот народ. За провокативната иконографијата со која беше пречекан, шефот на државата смета дека домаќините на Курти сакале да се допрофилираат кај својот потенцијален електорат
Во врска со шпекулациите дека се размислува за партиско име од високото раководство на СДСМ наспроти негова номинација за нов претседателски мандат, шефот на државата со одговор: „Моите релации со Владата се коректни, на таа тема немаме разговарано, другите интрапаритски дебати што ги имаат навистина не ги знам“
Посетата на косовскиот премиер не беше проблематична само по себе, туку неговите домаќини, вели шефот на државата Стево Пендаровски, коментирајќи ги реакции на неговата реакција по посетата на косовскиот лидер Албин Курти на Скопје и Тетово, која и по точно една недела ја бранува јавноста поради провокативната иконографија со знаме на „Голема Албанија“ со која беше проследена.
Имено, шефот на државата кој побара казни за организаторите на собирите во скопски Чаир и во Тетово поради провокативната националистичка иконографија, беше обвинет од партијата Алтернатива за албанофобија. Од партијата, исто така, рекоа дека напаѓајќи го Курти, Пендаровски сакал да се додвори на ДУИ за да добие поддршка за нова кандидатура за шеф на државата.
Во врска со ова, Пендаровски во неговото вечерашно гостување во „Тема на денот“ во дневникот на ТВ Сител, рече дека е толку долго на политичката сцена што и тие кои го напишале и говореле тоа знаат дека не е албанофоб.
Пендаровски вели дека има исклучително добра соработка со Курти и дека двајцата имаат добро мислење еден за друг. Во неговите јавни настапи во Скопје и во Тетово, вели Пендаровски не слушнал ништо навредливо за државата и македонскиот народ.
„Тоа е јасно. Се знам долги години и со Билал Касами и со Африм Гаши и со Изет Меџити итн, да не го зборувам овој другиот дел од албанскиот спектар. Со премиерот Курти имам исклучително коректна соработка, досега сум се сретнал многупати на различни конфернеции и ако смеам да си дозволам, можам да кажам дека има добро мислење тој за мене, како и јас за него. Посетата на Курти не беше проблематична сама по себе. Во неговата посета и во неговите јавни настапи и во Чаир и во Тетово не можам да видам ниту една реченица со која тој навредува Македонија или македонскиот народ. Мојата реакција беше на неговите домаќини. Прават нов политички субјект, се обидуваат да се окрупнат во албанската опозиција, претпоставувам дека на таков начин (со иконографијата) сакаа да се допрофилираат кај својот потенцијален електорат“,
рече Пендаровски.
Во врска со преименувањето на улицата „Втора македонска бригада” во „Адем Демачи”, шефот на државата вели дека во тоа немало ништо спорно. Неговата реакција, односно прашањето со кое, како што вели, сакал да отвори демократска дебата, било зошто сега се преименува улицата, ако одлуката за тоа била донесена пред две години.
„Неспорно е преименувањето на улицата „Адем Демачи” затоа што ако станува збор за човек кој извесен период живеел и студирал во Скопје и живеел токму на таа улица, ако станува збор за човек кому Евроспкиот совет му ја дава наградата Сахаров пред 30 години, јасно е дека не станува збор за некој локален национализам. Јас побарав демократска дебата затоа што одлуката за преименување на улицата е донесена пред две години, зошто сега ја имплементирате, што сте чекале до сега. „Втора македонска бригада” останува на друга улица. Ме чуди зошто токму сега одбирате да ја преименувате улицата после толку долг проток на време кога имате легитимна одлука на Град Скопје. Во таа насока беше барањето за демократска дебата со луѓето кои таму живеат“,
вели шефот на државата.
Националистичките изјави кои уследија на неговата реакција околу пречекот на Курти, како и оние во контекст на уставните измени, според Пендаровски спаѓаат во сферата на политички фолклор, кој нема употребна вредност.
„Тоа го ставам во сферата на политичкиот фолклор кој може за жал да разговри нациналистички страсти на двете страни и од тој апсект беше најмногу мојата реакција за собирите во Тетово и во Чаир“,
рече Пендаровски.
Пред отворањето на темата за посетата на Курти и за тоа дали неговите реакции по неа придонеле да загуби поени кај албанскиот електорат, Пендаровски беше прашан и ги изнесе своите ставови околу тоа дали уште ја има поддршката на СДСМ и ДУИ за нова кандидатура за претседател на државата.
Според шефот на државата за нов претседатески мандат нема да биде доволна само поддршката од политичките партии, иако без неа е невозможно да се победи на избори.
„Мислам дека нема да биде доволна, како што не беше ниту во 2019 година, поддршката само на две или три политички партии или само од политичките партии. Да потсетам набрзина, 31 политичка партија меѓу кои беа и овие две најголеми ми дадоа поддршка во 2019 година и повторно кумулацијата на нивниот партиски електорат не беше доволен за победа. Беа потребни и оние кои се неопределни и оние кои никогаш не гласале, т.н. независни, тоа беше исто така многу важно. Значи не само дали ќе ја имам партиската поддршка бидејќи јас не се обраќам, мислам дека тоа сум го покажал досега многупати, само на партиските електорати туку нвистина се трудам да бидам претседател на сите граѓани“,
рече Пендаровски.
Сепак, тој се согласи со новинарката, дека без партиска поддршка не се победува на претседателски избори.
„Ниту еден од петте претседали на државата, вклучувајќи ме и мене не победил и не станал претседател без поддршка на политичките партии и тоа е точно“,
рече Пендаровски.
Во врска со шпекулациите дека се размислува за партиско име од високото раководство на СДСМ наспроти негова номинација, шефот на државата со одговор:
„Моите релации со Владата се коректни, на таа тема немаме разговарано, другите интрапаритски дебати што ги имаат не ги знам навистина“.