Џорџ Флојд беше уапсен под сомнение дека користел фалсификувана банкнота од 20 долари, при што беше уапсен, а при апсењето почина додека полицаецот Шовин со колено го притискаше на неговиот врат девет минути
Поранешниот полицаец во Минеаполис, Дерек Шовин, денеска призна дека ги прекршил граѓанските права на афроамериканецот Џорџ Флојд при апсењето што заврши со неговата смрт, откако во септември изјави дека не се чувствува виновен по таа точка од обвинението.
Четириесет и пет годишниот Шовин во јуни беше осуден на 22 и пол години затворска казна за смртта на Џорџ Флојд. Но, му се заканува максимална казна доживотен затвор, иако обвинителите би можеле да бараат полесна казна бидејќи ја призна вината.
Џорџ Флојд почина за време на апсењето откако Шовин со колено го притискаше неговиот врат девет минути, што го сними случаен минувач на неговиот мобилен телефон. Инцидентот го шокираше целиот свет и го предизвика едно од најголемите протестни движења во САД во последните децении.
Шовин и уште тројца полицајци, Томас Лејн, Џ. Александар Куенг и Ту Тао, го уапсија Флојд под сомнение дека користел фалсификувана банкнота од 20 долари.
Лејн, Куенг и Тао се обвинети пред државниот суд за помагање во неговото убиство и нивното судење треба да започне во март.
Освен на државно ниво, сите четворица се обвинети на федерално ниво дека му ги ускратиле на Флојд неговите граѓански права бидејќи не му пружиле медицинска помош.
Шовин е обвинет и на федерално ниво за кршење на правото на Флојд да не биде неоправдано притворен со употреба на прекумерна сила. Тао и Куенг се обвинети на федерално ниво дека го прекршиле правото на Флојд да не биде неоправдано притворен со тоа што не интервенирале и не го оттргнале Шовин додека клечел врз неговиот врат.