Поради зголемениот број на случаи на ковид-19, Албанија ги затвора ноќните клубови и дискотеките, а дозвола за работа ќе имаат само рестораните.
За оние што нема да го почитуваат тоа, предвидена е парична казна од три милиони леки или околу 25 илјади евра и едногодишна забрана за работа.
Во сите објекти од услужната дејност, исто така, се забранува музика после 20 часот.
Како што информираше Огерта Манастирлиу, министерката за здравство и социјална заштита, на денешната прес-конференција, владата ја донела оваа одлука по предлог на Националниот комитет на експерти, откако било оценето дека овие средини станале жаришта на ковид-19.
„Како што ве информиравме секојдневно, Албанија продолжува да бележи раст на број на заболени од ковид-19. Оваа состојба низ која минуваме бара строга примена на безбедносните правила и протоколи. Секоја небрежност или непочитување на мерките, влијае врз здравјето на сите. Вирусот не избира кого ќе погоди. Тоа влијае врз сите возрасти и се шири брзо, кога луѓето тоа го дозволуваат“,
изјави Манастирлиу на денешната прес конференција.
Таа додаде дека е констатирано оти по олеснувањето на мерките овие средини се претвориле во места за собирање на младите каде што не се почитуваат никакви правила за заштита од вирусот.
„Сме го кажале и нема да се умориме да го повториме: наш приоритет број еден е да го заштитиме животот на граѓаните. Имајќи го предвид само овој приоритет, ќе ги преземеме сите неопходни мерки“,
порача Манастирлиу.
Откако ги наведе последните официјални бројки – 4 090 заразени, 2 311 оздравени, 112 починати и 1 667 активни случаи, со посебен акцент на растот на оние на кои им е неопходно болничко лекување, министерката ги замоли сите строго да ги почитуваат мерките и протоколите сѐ до откривањето на вакцина против вирусот.