Пријавено е и поплавување на дел од булеварот Борис Трајковски кај населбата Пинтија. Во текот на ноќта пријавени се и поплавени куќи во Горно Лисиче во општина Аеродром
Поради врнежите од дожд што во текот на вчерашните попладневни и вечерни часови го зафатија главниот град и неговата околина, зголемено е нивото на Маркова Река, што доведе до поплавување на неколку куќи, магацини и индустриски објекти во селата Студеничани и Батинци, како и во делови на населбата Пинтија, информираат утрово од Центарот за управување со кризи (ЦУК).
„Пријавено е и поплавување на дел од булеварот ‘Борис Трајковски’ кај населбата Пинтија. Во текот на ноќта пријавени се и поплавени куќи во Горно Лисиче во Општина Аеродром“,
велат од ЦУК.
Автомото сојузот на Македонија (АМСМ) информира дека се непроодни локалниот пат од селата Горно Лисиче кон Долно Лисиче, како и првиот мост во Батинци.
Поради излевањето на Маркова Река, автобусот со број 70 на ЈСП „Скопје“ ќе сообраќа до почетна/крајна станица „Дрисла“, а автобусот со број 33 преку населбата Драчево во двете насоки.
Железничкиот сообраќа од синоќа е во прекин во правец Лисиче и Драчево и обратно, а патничкиот се одвива преку станицата Трубарево.